رواية حب فرنسية بعنوان <نضال الحب>

إحصائية العضو

اوسمتي

 
مجموع الاوسمة: 1

إحصائية العضو

اوسمتي

 
مجموع الاوسمة: 1

المشاركة الأصلية كتبت بواسطة @كلي ذوق@ سيدتي كاتمه الاسرآر إنكِ تكتبين بماء المطر وتغتالين الحرف بالسحاب حاولت أن أبحر بعيداً لكنني خفت أن أغرق فأنا لا أتقن فن السباحة مثلكِ فأمواجكِ عاليه الشموخ دمتِ كما عهدناكِ منبع للجمال والإبداع باقة قرنفل أتركها لقلبكِ \\ اعجبني جداً الجزء الثالث.. دمتي مبدعهـ متااابع لكتاباتكـ حتي النهايهـ.. سوف اكون هنـــ\\ــا في الانتظار

إحصائية العضو

اوسمتي

 
مجموع الاوسمة: 1

المشاركة الأصلية كتبت بواسطة ღ.نـاَدِرة الِـوَجــُودٌ.ღ قلم جميل ينزف من انسانه مبدع ـه نجنون في إنتظآر آلبآقي

إحصائية العضو

اوسمتي

 
مجموع الاوسمة: 1

أليسا وسوسن كانوا واقفين عند جهة يتكلمون لما شافوا هانتر مع كيرا، و حسوا بشي صاير بينهم بعد ماتركت كيرا هانتر، ردت للصف وقعدت مكانها بعدها دخلت أليسا وسوسن وقعدوا صوبها.
أليسا: صار شي بينش وبين هانتر؟
كيرا هزت راسها بلا وهم سكتوا ولما دخل هانتر كيرا فتحت كتابها تتصفحه وهانتر عرف من حركتها إنها أكيد عصبت عليه، بغى يكلمها ويفهمها السالفة لكن الأستاذ دخل وماسمح له الوقت، قعد مكانه وطالع كيرا وواضح عليها تتجنبه.
بليك حس باللي صاير بينهم: ما كلمتها؟
هانتر: بلى.
بليك: ما سامحتك؟
هانتر: خلها تكلمني أول..ماقدر ألومها، لوكنت مكانها بسوي أخس منها.
بليك: هدي بالك كيرا متفاهمة، أكيد بتكلمك بنفسها عقب.
كيرا تفكر بكلام هانتر لها بدون ماتنتبه للشرح، كملت الحصة الأولى والثانية وراها وبدت الثالثة وكيرا ماطالعت هانتر.
بنص الحصة كيرا حست بتليفونها يرن هي مخلتنه silent لكنه هزاز على طول طلعته بدون مايحس الأستاذ، وشافته مسج من عند هانتر مافتحته توها بدخل تليفونها رد رن مرة ثانية ونفس الشي مسج من هانتر سكته بدون ما تقرا.
أليسا شافتها واستغربت من تصرفها بعدها طالعت هانتر اللي عينه على كيرا واشر لأليسا إذا قرته أو لا وهي أشرت له بلا.
هانتر خاب ظنه وتمنى لو يطلع الأستاذ عشان يروح لها، بعد ماكملت الحصة وطلع الأستاذ ونص الطلاب طلعوا وراه على الكافيتيريا، عمى كيرا تلم كتبها عشان تطلع هانتر مسك كتبها وحطاهم على الطاولة وهو يطالعها: مابخليش تطلعين قبل ما تسمعيني.
بليك أليسا وسوسن واقفين قريب منها وطالعوه وبعض الطلاب اللي شافوا حركته على طول طالعوهم.
هانتر: كيرا ارجوش لا تخلين هذا يفرق بينا انتين تعرفين شكثر تعنين لي، ادري اللي قلته لش مساعه جرحش لكن صدقيني عمري مابسامح نفسي بس ارجوش سامحيني بسوي لش كل اللي تبينه بس لا تزعلين مني.
طالعته بعدها نزلت راسها وماردت عليه.
هانتر: كيرا قولي أي شي صارخي ضربيني زفيني بس لاتسكتين ارجوش.
طالعته: ليش لهاي الدرجة تهمك مشاعري؟
هانتر: شلون ماتبينها تهمني وانتين أول إنسانه قدرت تدخل قلبي وتسكنه وأنا لغبائي بغيت ابعدش عني..كيرا أنا بدونش ولاشي.
كيرا: بدوني (رفعت راسها و طالعته) أو بدون أبوي؟
انصدم: شنو قصدش؟
كيرا بدت عينها تدمع: هانتر قول الصدق، انت تحبني لان أبوي الملك؟ صح!
هانتر انصدم من اللي سمعاه عمره مافكر جذي عمره مافكر يحب كيرا لان أبوها الملك، هو حباها لشخصيتها، كلامها، أخلاقها، بكل شي فيها: كيرا شقاعده تقولين؟!
نزلت دمعه من عين كيرا وهي تطالع هانتر: بس جاوبني.
طالعها: مستحيل اصدق اللي قدامي كيرا..كيرا انتين تعرفين مشاعري زين مستحيل أتقرب لوحده عشان أبوها حتى لو كانت انتين، شنو تفسرين لي طول السنين ماتقربت منش عشان بس ما سبب مشاكل مع أبوش والحين لما حبيتش وحبيتيني تقولين لي عشان أبوش..كيرا أنا من متى فكرت جذي؟! جاوبيني.
كيرا: بعد كل اللي قلته لي مساعه خليتني بين ناريين، فكري يروح ويجي فيني، شنو توقعت يعني؟ (نزلت دموعها) هانتر انت أحسن شي صار لي بدنيتي، ليش ظنيت فيني جذي؟
هانتر تقرب منها ومد يده يمسح دموعها: وانتين أحلى شي صار بحياتي شلون تبيني أفرط فيش، صدقيني كيرا أنا آسف على كل اللي قلته..حبش بقلبي أقوى من كل شي.
طالعته بعيونه: بكل يوم حبك يكبر داخلي.
حضنها هانتر وأخيرا حسوا ثنينهم براحة ماتنوصف.
هانتر طالع كيرا ومسح دموعها عن ويها: صدقيني ماراح ازعلش ابد أفضل امو..
حطت يدها على بوزه عشان لايكمل كلامه: لاتقولها، تبي تذبحني.
ابتسم لها ومن كثر فرحته حملها دار فيها دورة كاملة بعدها نزلها وظل يطالعها حده حده فرحان والظاهر نسوا إنهم بالمدرسة.
الكل يطالعهم ومستانسين لهم لكن أكثر من شاب يتمنى يكون مكان هانتر، والبعض تمنى لو المشرف يجي يشوفهم عشان يشوفون شنو يقول لهم لتصرفهم لان هاي الأمور ممنوعة بالمدرسة.
هانتر طالعهم وهم على طول غاوروا واللي طلع كأن مو صاير شي.
بليك: أخيرا ريحتونا، عورتون قلوبنا.
ابتسموا له.
هانتر طالع كيرا: مرة ثانية ماني مدخل فيش سوي اللي تبين تسوينه.
ابتسمت له بعدها راحوا يقعدون بالحديقة مع بعض، في شي هانتر وكيرا ماعرفوا بصفهم.
كمن طالب صوروا اللي صار بينهم من أول ماتكلموا لين ماحملها و طالعهم، من كثر فرحتهم ثنينهم ماحطوا بالهم على ذلين الطلاب.
طبعا ذلين مو كلهم نيتهم صافية هم منتظرين يشوفون مثل هاي الحركات من كيرا عشان ينشرونها وبالفعل من تلاقوا مع ربعهم طرشوها بينهم.

كورابيكا وكونر قعدوا يم البحر اللي صاير ورا القصر يسولفون.
كونر: خبرتني ألس.
كورابيكا: مادري شنو بتسوي اليوم، لو خلتني أتفاهم معاه أحسن.
كونر: خلها تعتمد على نفسها، لاتخاف كيرا عاقلة وتعرف تتصرف، متأكد إنها مع هانتر أكيد تصالحوا.
كورابيكا: لو زين، هي واجد تعزه أول مره أشوفها متعلقة بواحد مثله.
كونر: أكيد حبيبها، شلون ماتبيها تتعلق فيه!
كورابيكا: لكن إن اكتشفت بالنهاية انه يلعب عليها بدفنه بيدي.
كونر: منت واثق فيه؟
كورابيكا: الثقة بروحها ما تكفي كونر، لا تنسى كمن واحد حاولوا يتقربون منها.
كونر: المشكلة أختك واجد حلوه وجذابة وصارت بت الملك، ماتدري الواحد بحبها لشنو جمالها أو أبوها؟
كورابيكا: أتمنى هانتر صادق بكلامه.
كونر: لاتخاف، كيرا تعرف تميز بين اللي يحبها صدق واللي يبي يلعب عليها.
كورابيكا: المشكلة إنها ذكية تستوعب الشي بسرعة وتعطيك ألف تحليل للسالفة.
كونر: هذي هي كيرا.
ابتسموا وظلوا يتكلمون عن خواتهم شوي، بعدها انتقلوا لحبيبتهم.

كيرا وهانتر لما راحوا للحديقة وقبل لا يقعدون لمحت كيرا كايبا اللي كان قاعد مع جوي، هو من شافها نزل راسه أما جوي ماقدر يشوفها لأنه عاطنها ظهره.
كيرا تذكرت اللي صار لها أمس واليوم، لكنها تفاجأت لما قال لها هانتر: إذا تبين تروحين له ماعندي مانع.
كيرا طالعته وهو ابتسم لها، بعدها طالعت جوي وفكرت شوي عقب راحت له.
كايبا لما شافها يايه لهم عرف إنها ماعندها مانع تكلمه فقام عشان يخليهم على راحتهم، جوي ماهتم وايد لكيرا مع انه استانس لوجودها.
كيرا بابتسامه: شخبارك؟
ابتسم خفيف: تمام..و انتين؟
استغربت كيرا من رده بالعادة يقول لها بخير دام انتين بخير أو اللي يشوفش تنزاح هموم الدنيا عنه وغيرها، لكن ولا مرة قال لها تمام.
كيرا: تمام.
ظلوا ساكتين شوي
كيرا: جوي..شنو صار فيك؟ وايد تغيرت.
جوي: مو صاير شي.
كيرا: شلون مو صاير شي وانت متغير على الكل حتى على كايبا مو معقولة بيوم وليله بتتغير، لازم في سبب!
جوي: توش جايه تسألين عن أخباري، وينش عني من زمان كنت أجيش بنفسي وانتين ماتطيقين تشوفين رقعة وجهي، الحين تبين تعرفين شنو اللي غيرني.
نزلت راسها وتذكرت كل مرة يجي لها جوي هي تباعده عنها، لكنها الحين هي بنفسها يت لعنده تسأل عنه و هو يجازيها بالعتاب.
جوي: انتين يكيرا ..انتين اللي غيرتيني (طالعته) من يوم كلمتيني والدنيا تدور فيني، مادري وين بتوديني الدنيا بكبرها فاتحه لي ألف باب مادري أي باب اختار؟..بالبداية اخترت بابش لكني طلعت منه خسران، وكاني رجعت للبداية من جديد وأخاف اختار باب بالغلط واطلع بنفس النتيجة ..الحين عرفت ليش يقولون خسارة الحب خسارة الدنيا.
حارت كيرا بشنو ترد عليه.
جوي: كيرا لا تعبين روحش معاي عندش واحد يحبش ويقدرش أكثر مني ومستعد يسوي المستحيل عشانش، انصحش ما تخسرينه..آسف لأني تعبتش معاي أنا ماستاهل شي منه، ادري شنو تبين تقولين لا تعبين روحش ولا تخافين علي بكون بخير ومستانس إذا كنتين مستانسه.
ابتسمت له وتوها بتقوم .
جوي: كيرا طيبة قلبش أجمل مافيش تعكس جمالش لنور..حافظي عليها.
ابتسمت: لاتوصي حريص جوي، اهتم بروحك.
ردت لربعها مستانسه وخبرتهم باللي صار بطريقهم للصف.
جوي ارتاحت نفسيته وايد وحس انه لازم يهتم بروحه وتقريبا رجع لطبيعته لكن بصورة ثانية، جوي الشرير مات والحين صار جوي الطيب.
أصحابنا الخمسة نسوا إنهم أمس ماحلوا أسئلة التقويم وهذا خلى البروفيسور ينصدم لدرجة كبيرة، وراح يكلم المشرف.
المشرف: مستحيل، مو معقولة خمستهم أصفار.
البروفيسور: للحين ماني مصدق كل درجاتهم بالامتحانات القبلية وللتقويم كاملة ماعدا جوي لكن هذي أول مرة يحصلون أصفار والورقة فاضيه، عمرها ما صارت عندي.
المشرف: بهاي الحالة مانقدر نستثني واحد منهم، أكيد صاير بينهم شي.
البروفيسور: خلنا نفرض صاير بينهم شي عاد بحطون حرتهم بدرجاتهم، ماظن خصوصا كيرا وأليسا يبون يرفعون معدلهم مو ينزلونه.
المشرف: شرايك عشان ما نظلمهم نناديهم ونشوف شنو بقولون.
البروفيسور: مو مشكلة.
طرشوا طلب لستدعائهم.

هاري قاعد بالمكتب مع المستشار ماله لما اتصل له جون مارشال الرئيس الأمريكي.
جون: شخبارك هاري، وشخبار الأهل؟
هاري: اهلين جون، كلنا بخير وانتون؟
جون: تمام، بجي المجلس الأسبوع الجاي ؟
هاري: إي أكيد لاتخاف.
جون: تعال عاد انت وي الأهل.
هاري: لا ماظن كيرا للحين بالمدرسة ماعطلت.
جون: خسارة من زمان ماشفتها، شلونهي بالدراسة؟
هاري: تمام.
ظلوا يتكلمون شوي عن بعض شغلاتهم.
نرد للمدرسة بعد ماستدعوا الشباب.
الشباب: صباح الخير.
المشرف + البروفيسور: صباح النور، استريحوا.
طالع المشرف البروفيسور عشان يبدأ كلامه معاهم.
البروفيسور وهو يوزع أوراق التقويم: هذي أوراقكم مال التقويم الامسي.
كلهم انصدموا وتذكروا إنهم ماجاوبوا على الأسئلة أمس، بهاي الدقايق اللي كأنها ساعات بالنسبة لهم بدت عيونهم تدمع وهم منزلين راسهم من كثر الصدمة والخجل منها، خصوصا كيرا و أليسا أول مرة بحياتهم يجيبون هالقد ودهم يذرفون دموعهم كلها لكن الصدمة مسيطرة عليهم.
المشرف: ادري إنكم منصدمين من درجاتكم إحنا مثلكم ماتوقعناكم بيوم بتجيبون هاي الدرجة.
البروفيسور: كان بمكاني أعطيكم إياها قدام الصف كله لكن فضلنا نجيبكم لهني ونعطيكم إياها أحسن من تتفشلون هناك..والحين ممكن نعرف شنو اللي خلاكم تجيبون هاي الدرجة؟
المشرف والبروفيسور انتظروا جوابهم، لكنهم ساكتين منزلين راسهم ومو عارفين يتكلمون.
المشرف: كيرا أليسا هانتر بليك جوي سمعوني عدل، منصدمين من درجتكم ok كلنا انصدمنا لكن الحين نبي تفسير، أنا أعرفكم زين مستحيل تجيبون هاي الدرجة بيوم واحد بدون سبب والحين تكلموا قبل لا استخدم معاكم أسلوب ثاني.
ماعرفوا الشباب شنو يقولون مهم قادرين يفكرون بعد ماشافوا درجتهم.
المشرف: دام انتون مصممين ماتتكلمون ما خليتون لي حل ثاني.. درجتكم راح تنزل مثل ماهي بدفتر العلامات وراح تنحسب ضمن الدرجات النهائية، يعني ماعندكم أمل توصلون 90 هاي السنة إلا إذا تكلمتون الحين.
انصدموا كلهم باللي سمعوه إذا بقوا ساكتين راح ينتهي كل شي.
البروفيسور: اختاروا يا إنكم تتكلمون أو راح تنزل درجتكم بالدفتر (أشر على دفتر العلامات وحطاه قدام المشرف وبيده القلم) صدقوني من مصلحتكم تتكلمون.
انتظروا دقايق لكن بدون فايدة.
فتح المشرف الدفتر: بعطيكم آخر فرصة بتتكلمون أو لا؟ عندي ألف شغل غيركم مابقعد انطركم سنة وانتون ساكتين..بنشوف أول اسم كيرا هاري بوتر صفر.
توه بنزل الدرجة وقفاه جوي: أرجوك لا تنزلها، كل اللي صار بسببي هم مالهم ذنب.
المشرف: قول أسمعك.
جوي: قبل كمن يوم حاولت أتقرب من كيرا لكنها قالت لي كلام اثر علي واجد و.. من بعدها ماقمت اهتم بنفسي أو بأي شي حوالي، كايبا خاف علي وراح يكلمها لكن..
ماعرف شنو يقول.
هانتر كمل عليه: لكني منعتها.. ظنيته يمثل عليها ويبي يلعب بأفكارها، ضايقتني هاي السالفة وماعرفت أركز وقت الاختبار.
فكر المشرف بكلامهم: انزين على حسب كلامكم، السالفة شاملتنكم ثلاثتكم بس أليسا و بليك شنو السبب؟
بليك أخذ له نفس: نفس الشي تضايقت لما ألس سألت كايبا شنو يبي منا وما عرفت أفكر عدل وقت الاختبار.
البروفيسور: المفروض إنكم وقت الدراسة ماتشغلون بالكم بأي شي ثاني، الحين يسوى عليكم تخسرون 10 درجات عشان هاي السالفة، 10 درجات بمكانها ترفع من مجموعكم أكثر.
المشرف: هذي المرة راح أتساهل معاكم وما بنزل الدرجة لكن بشرط (طالعوه مستغربين) تعوضون بالامتحان الجاي بدرجة كاملة، مرة ثانية مو تسوون مشاكل وتحطون حرتكم بالدراسة.
ارتاحوا الشباب ووعدوا المشرف والبروفيسور انه ماراح يتكرر مرة ثانية، بعدها ردوا لصفهم مستانسين.
البروفيسور: مسكينة كيرا ما يسوى عليها كل اللي يصيدها.
المشرف: مالها أي ذنب، المشكلة من تخرج أخوها معظم الشباب استغلوا الفرصة ويبون يتقربون منها.
البروفيسور: لاتخاف عليها الظاهر هانتر حابنها أكيد بيحميها بدال أخوها.
المشرف: إي واضح عليهم، لكن هذي المرة الثانية اللي تكون سبب المشكلة جوي عشان كيرا.
البروفيسور: بس أحسهم الحين صاروا ربع، انزين أنا استأذن الحين عندي حصة واجد تأخرت.
المشرف: إذنك معاك.

بعد الغذا خبرت كيرا أخوها باللي صار بينها وبين هانتر وفهم ليش هانتر شك جذي لكنه ارتاح لان هانتر كان مصمم يقنع كيرا بأنه آسف، بس بعدها عصب عليها لما خبرته عن الامتحان.
كورابيكا: إذا ماجبتين علامة كاملة بالامتحان بكون شغلش علي مو على أبوي.
كيرا: شلون تباني ادرس وأنت راز فيسك عندي.
كورابيكا: آآخ منش بس.
ابتسمت: شنو أسوي طلعت عليك.
كورابيكا: أقوم بكرامتي أحسن.
كيرا: فديتك خوي اقعد أستريح اهمشي ماتزعل مني.
كورابيكا: الحين فديتيني، تعالي مني أشوف.
كيرا تباعدت عن أخوها وظلوا يتمازحون بعدها خلاها تراجع.

أليسا خبرت أخوها باللي صار حتى عن كيرا وهو عصب عليها على الامتحان.
كونر: هاي آخر مرة ليش تسوين جذي.
أليسا: حاضر والحين إذا تتكرم وتخليني أراجع لا رد اييب لك نفس الدرجة.
كونر: افاا ألس تطرديني.
أليسا: عادي إلا كنور.
بهاي الوقت دخلت أمهم عليهم: شنو تسوون؟
كونر: ولا شي، أنا بروح لداري.
غمز لأخته وهو طالع.
الوالدة: شلون دراستش؟
أليسا: تمام، عندي امتحان مهم بعد يومين.
الوالدة: ذاكري زين، اليوم بالليل امبيش معاي بالمجلس.
أليسا: بكرة مدرسة ماما.
الوالدة: مابنطول بس بنتفق على كمن شغله وخلاص.
أليسا: عمى تتفقون كلكم يبي لكم سنة، مرة ثانية بروح معاش.
الوالدة: بس عشان بكرة عليش مدرسة ماباخذش.
أليسا رن تليفونها: Thanks mom.
من طالعت اسم المتصل تدودهت.
الوالدة: Ok بخليش الحين تراجعين.
هزت راسها بأي ومن طلعت أمها ردت عليه: ألو.
المتصل: ياهلا ومرحبا بأحلى ألو سمعتها، شخبارش حياتي؟
خجلت من كلامه: تمام، وأنت؟
بليك: تمام بسماع هالصوت..عسى بس ماقاطعتش بشي.
أليسا: لا ماعندي شي.
ظلت تتكلم معاه شوي بعدها سكوا عن بعض وكل واحد يفكر بالثاني.

كونر من قراه ين ينونه واتصل لها وهي من شافت اسمه فز قلبها من مكانه.
برو: ألو.
كونر من سمع صوته تخيلها واقفة قدامه: ألوين وسهلين بالحبايب، وحشتيني حياتي.
برو خجلت منه: وأنت أكثر.
كونر: شخبارش ؟
برو: تمام، وأنت؟
كونر: أنا، أنا عاشق ولهان يدور على قلبه مو لاقيه.
ابتسمت وقالت بدون شعور: ليتني ألاقيك.
استانس: لو بيدي جيتش على طول وما خليتش تغيبين عن عيني لحظة وحده.

كورابيكا قاعد بداره على اللابتوب يشوف المواضيع بالمنتديات، بواحد من المنتديات جذباه عنوان لموضوع (الأميرة كيرا بوتر مع حبيبها) ياه فضول ودخل الموضوع بعد ماقرى كل الكلام المكتوب فهم انه صار لهم اليوم بالصف وان حبيبها كان يعتذر لها، بنهاية الموضوع محطوط فيديو للي صار شغلاه وانصدم من اللي شافاه هانتر مع أخته.
واحد من الطلاب اللي كانوا بالصف لما هانتر اعتذر لكيرا صوراهم و نشر الفيديو بالمنتدى، بهاي الوقت دخل ماكس وعنده عصير لكورابيكا.
ماكس: تبي مني شي ثاني كورابيكا.
كورابيكا كان مندمج وي الفيديو يبي يعرف مين اللي صورهم.
ماكس: كورابيكا.
طالعاه: نعم.
ماكس: في شي؟
كورابيكا: لا ولا شي بس ناد لي كيرا.
ماكس: حاضر.
ماكس راح لكيرا و كانت تكلم هانتر.
كيرا: لحظة هانت (تكلم ماكس) نعم؟
ماكس: آسف على الإزعاج بس كورابيكا يبيش.
استغربت: بشنو؟
ماكس: مادري.
كيرا: الحين بروح له.
طلع ماكس.
كيرا: هانتر لازم أروح الحين.
هانتر: Ok بكلمش عقب.
كيرا: باي.
راحت لاخوها.
تقدمت منه: شنو تبي؟
طالعها: ليش ماقلتين لي في واحد كان يصوركم؟
استغربت: عن شنو تتكلم؟
اشر على الفيديو: هذا.
شغلاه لأخته وحدها انصدمت: Oh my God .
كورابيكا: معناتها ما كنتين تعرفين؟
كيرا: لا أول مرة أشوفه، هاي صار اليوم بيني وبين هانتر ماكنت ادري في احد يصور.
كورابيكا: يعني انتون ثنينكم مادورتون مكان تتكلمون فيه غير قدام الصف كله.
كيرا: أني شدراني هو يى لي وكلمني، لاتقول بكل المنتديات.
كورابيكا طالع ويه أخته وشاف دمعه محبوسة بعينها: مادري، هدي بالش مردي بعرف مين هذا الخسيس.
كيرا: بعد ما ينتشر بكل محل.
كورابيكا: هانتر ما قال لش شي عن هذا؟
كيرا: لا لو عرف في احد يصورنا أكيد ما بيسكت عنه.
كورابيكا: بحذف هذا الموضوع قبل لحد يشوفه، بكلم هذا العضو بعد بشوف من وين له، لا تخافين لو بس اعرف من يكون دفنته مكانه.
كورابيكا مشرف بهذا المنتدى فسهل عليه يحذف المواضيع.
كيرا: بكلم هانتر يمكن عنده خبر.
راحت لدارها انبطحت على سريرها تصيح يمكن صدق هي بت الملك وفي لها صور بالمنتديات، لكن ولا مرة تجرأ احد يصورها بدون علمها ويقوم ينشرها.
بعد ما هدأت اتصلت بهانتر لكنه سكاه وهو بنفسه اتصل لها.
هانتر: هلا حياتي.
كيرا: هلا هانت.
هانتر شك بصوتها متغير: صاير لش شي؟
كيرا تحاول تغير صوتها: لا ولاشي، بس بغيت أسألك.
استغرب: تفضلي.
كيرا: هانتر تذكر اليوم الصبح لما كلمتني بالصف.
هانتر: إي.
كيرا: تذكر انك شفت..احد يصورنا؟!
انصدم: يصورنا! مستحيل احد يتجرأ أو حتى يفكر يصورنا.
كيرا من كلامه عرفت انه أكيد ماشاف الفيديو: بس هاي اللي صار.
هانتر: كيرا شنو قاعدة تقولين؟
دمعت عينها: روح لمنتدى **** وشوف بنفسك.
سكته عنه وردت تصيح.
هانتر شغل اللابتوب ماله وراح للمنتدى وشاف الموضوع وحده انصدم، ما كان متوقع في احد يتجرأ يصورهم أو انه يفكر ينشر صور كيرا، لو بس هو طالع بالفيديو أهون عنده من تكون معاه كيرا حتى الصوت طالع لكنه خافت بس ينسمع، يبي يعرف مين اللي تجرأ وصورهم.
بعد فترة اتصل فيه بليك بعد ماشاف الفيديو.
بليك: أنا ماذكر شفت واحد يصوركم.
هانتر: خلني بس اعرفه بذبحه، بكل حقارة يصور لا بعد ينزلها بالمنتدى هالحقير.
بليك: كلمت كيرا؟
هانتر: هي اللي خبرتني.
بليك: مسكينة أكيد انصدمت.
هانتر: إي واضح من كلامها، لكن براويه بكرة أكيد من اللي كانوا واقفين معانا استغلوا الفرصة وصوروا على بالهم مسرحية قدامهم.
باين على هانتر واصل حده من هاي التصرف، لكن بليك مايقدر يلومه مصورينه هو مع حبيبته بلحظة يعتبرونها خصوصية بينهم مايبون احد يعرف عنها يقومون و ينشرونها.
بعد فترة كورابيكا حذف الموضوع وطرش رسالة خاصة للعضو يستفسر عنه بطريقة غير مباشرة.

كيرا التقت بأليسا سوسن عند الخزانات وهم عرفوا بالسالفة من أمس.
أليسا: بشنو رد على كورا؟
كيرا: كل اللي قالاه انه معاي بالصف، ولما شاف هانتر يكلمني استغل الفرصة وصور وقال بعد مو بس هو الوحيد اللي كان يصورنا في كمن واحد بالخشه صوروا.
سوسن: أبوش عرف بالسالفة؟
كيرا: أبوي ما يقعد على المنتديات، ما ظنه عرف.
أليسا: لو عرف يى اليوم الصف بنفسه كلماهم وخلى كل واحد منهم يرتجف مكانه.
سوسن: دام جذي خبريه عشان نعرف مين اللي صوركم.
كيرا: أني أصلا ماخبرته عن هانتر تبيني اخبره عن اللي صار، بعدين مامبي اشغله عن شغله اللي عنده يكفيه مامبي أزيده.
يى لهم هانتر مع بليك: صباح الخير.
البنات: صباح النور.
هانتر طالع كيرا شكلها متغير عن قبل: لاتخافين كيرا مردي بعرفه ويحلم بعدها يعيش.
بليك: تتوقعون مين اللي يتجرأ ويسوي كل هذا؟
كيرا: مامبي اشك بأحد تالي يطلع مو هو، خلونا نرد للصف الحين برن الجرس.
كيرا تقدمت و أليسا طالعت الشباب بعدها لحقتها وي سوسن.
هانتر يحس كيرا كلش تعبانه: إلا اعرف الحقير الخايس اللي سوى كل هذا.
هانتر راح لصفه وبليك يمشي معاه: هانتر هدي بالك لاتسوي شي تندم عليه.
طالعاه: شنو بتسوي إذا احد صورك مع ألس بدون ماتدرون؟
بليك: الحين انت هدي بالك وفكر عدل لاتستعجل ادري فيك تبي تعرفه أنا بعد امبي اعرفه، لكن وأنت معصب ما بتركز عدل.
هانتر سكت عنه ودخل الصف يطالع الكل وده يعرف مين منهم، قعد مكانه وبعده دخل الأستاذ.
هانتر من الصبح أول مادخل للمدرسة يحس بأنظار الكل عليه، هذا الشي أكيد لان الكل تقريبا صار عندهم خبر باللي صار بين كيرا وهانتر و كلما واحد شافاه يقولون هذا حبيب الأميرة، لكنهم ما يتجرؤون ينطقون كلمة وحده قدامهم.
بصف بايبر قبل لا يدخل الأستاذ بايبر وبرو سمعوا الطلاب يتكلمون عن الفيديو ويطرشونه مابين بعض، وحده من ربعهم راوتهم الفيديو وحدهم انصدموا.
مي: ما صدق ما وصلكم خبر المدرسة بكبرها عرفت.
برو: لكن مين اللي صورهم؟
مونكا (بت عم بايبر): واحد صور بت الملك تبينه يعترف لش.
سونا: حطوهم بمنتدى **** رحت امبي أتأكد لقيت الموضوع محذوف.
بايبر: حتى بالمنتدى، هاي ناوي على عمره يدفنونه.
مي: لو شفتون شكل هانتر باين عليه واصل حده من السالفة.
بايبر: لكن على شنو كانوا يتكلمون خل الكل يصور؟
سونا: الكلام مو كلش كلش واضح لو دققتين عدل تسمعينه، واني اللي فهمته هانتر يبيها تسامحه عاد على شنو؟ مادري.
برو: مسكينة كيرا ما يسوى عليها.
مي: لكن هي لها صور بالنت فعشان شنو بتزعل!
بايبر: صور منزلين من جرايد أو مكان ثاني غير عن فيديو مصورينش بدون ماتدرين.
سونا: بس هي بت الملك أحس مافيها شي إذا صوروها.
برو: بس عشان هي بت الملك لازم كل العالم يصورها بدون علمها، إذا انتون صوروكم بدون علمكم شنو بتسوون؟
سكتوا لان كلامها صح محد يرضى يصورونه بدون علمه، فشلون إذا كنت بت الملك.
بعد مادخل الأستاذ الكل قعد مكانه.
برو تساسر بايبر: خبرش كورابيكا بشي عن هذا؟
بايبر: لا، لما كلمته كان عادي ماحسيت من صوته فيه شي.
برو: يمكن ما عرف.
بايبر: لا ما ظن، كيرا ما تخبي أي شي عنه.
برو: مردهم بيعرفونه، ماظن هانتر بيسكت عن السالفة.
بايبر: واني بعد.
الأستاذ طالعهم ثنتينهم لما شافهم يتكلمون وهم نزلوا راسهم وسووا روحهم يحاوسون بالكتاب يقرون الدرس عن يا زعم.
كورابيكا وكونر بهاي الوقت كانوا مع أبوتهم بالاجتماع، لكن فكرهم أكثر شي باللي كان يصور كيرا.

كيرا وأليسا وسوسن قعدوا مع ربعهم وهانتر وبليك بعد ظلوا مع ربعهم.
كام: أنت شنو ناوي تسوي المدرسة بكبرها عرفت عن السالفة.
هانتر: شدراني لو بس اعرف من يكون.
طومي: ماني قادر اصدق السالفة شلون جته الجرأة يصوركم وينشرها.
بليك: مرده بينكشف.
هانتر طالع كيرا اللي كانت قاعدة مع ربعها وفكره بالسالفة.

رد الكل لصفه، بصف كيرا بعد ما اكتمل عدد الطلاب سك هانتر الباب ووقف يكلم الصف كله.
هانتر: سمعوني كلكم، مامبي لف ودوران بالسالفة الجريء منكم يوقف الحين إذا صدق هو ولد أمه يقول لي هو اللي صورنا.
احد الطلاب: إحنا ماكنا معاكم أمس شلون بنصوركم.
هانتر: مو مشكلة أنا ما اتهمت الكل، ادري مو كلكم كنتون هني معظمكم لكني عارف إن اللي صورنا موجود هني و يسمع كلامي الحين، بتقولون لي مو بس هو اللي صور ok ادري مو واحد اللي صور لكني ادري واحد هو اللي نشراه بالمنتدى، فالحين إذا فيه جرأة مثل ما صور ونشر يوقف الحين ويعترف قبل لا أنا اعرفه..يعني منتون راضين تتكلمون مو مشكلة لكن صدقوني إذا عرفته يا ويله مني و امبيه يسمع كلامي عدل أنا مادري إذا هو ولد أو بنت لكني متأكد 100% انه ولد، لا تظنوني بسكت عن السالفة بإمكاني أوصلها للمدير و أطلعه لو من تحت الأرض وإذا على باله السالفة مستحيل توصل لهناك بقدر أوصلها بين يوم وليلة ومايهمني ولد منو هو لأنه لو ولد شريف وعاقل ماقام يصور وينشر على الدنيا كلها ويستغل الفرصة بس عشان كيرا بت الملك وإذا عادي عنده الناس تمشي وتصور خواته خل يصور قد مايبي لكنه بيندم عقب، مامبي أعيد واكرر الكلام لكن يكفي إني عرفت انه جبان و مافي بأمه خير يعترف.
احد الطلاب: ليش ما تفتش التليفونات كامل، بدال ما ترمي الكلام على الكل.
هانتر: تظني غبي ادري إنكم كلكم عندكم الفيديو سواء نزلتونه من النت أو من ربعكم.. ليش أنا مستعجل مردي اعرفه لو طال الزمن أو قصر وذيك الساعة بيعرف شغله معاي لأنه ماعرف منهو هانتر براودلي عدل.
رد لمكانه والكل قام يتكلم عنه ليما دخل الأستاذ.
هانتر لما كلمهم حافظ على كل هدوئه عن لا يرتكب بالصف كامل جريمة.
كيرا فرحت بداخلها لتصرفه و دفاعه عنها لكنها بعد ودها تعرف من هذا الشاب أو يمكن الشابة اللي صورهم، حاولت تتذكر اللي صار أمس لكن بذاك الوقت كل تفكيرها بهانتر حتى إنها نست كونها بالصف.

بعد ماطلع الأستاذ وبعض الطلبة طلعوا راحت كيرا لهانتر معاها أليسا.
كيرا: ماكان داعي تقول هذا الكلام.
هانتر: عجل تبيني أظل ساكت وأحط رجل على رجل.
كيرا: ما قلت جذي لكن..
قاطعها: كيرا لاتخافين مردي بعرفه إذا مو اليوم بكره، مو هو اللي بخوفني عشان اسكت عنه.
بليك: كيرا دام هانتر قال جذي لاتخافين تراه مو هين بهاي الأمور إن عرفاه ذبحاه.
كيرا: مامبيه يورط روحه بمشاكل عشاني، هاي مو أول مرة يصوروني بدون مادري.
هانتر ابتسم لخوفها عليه: لاتخافين علي كيرا مابصيدني أي شي، شنو فايدة النينجا عجل.
ابتسمت له وكل ما لها تنعجب فيه أكثر من قبل جرأته كلامه والأكثر من هذا مستعد يخاطر بروحه عشانها، كل هذا وشلون ماتبونها تحبه.

بدار كيرا بعد ما غيرت ثيابها دخل عليها أخوها.
كورابيكا: ما صار شي اليوم؟
كيرا: لا، عرفت شنو اسمه؟
كورابيكا: لا ما قال، انتين ما عرفتينه؟
كيرا: شلون بعرفه واني مادري من هو، من قله طلاب صفنا، بعدين هانتر كلمهم.
كورابيكا: شنو قال؟
كيرا خبرت أخوها باللي صار، و اطمن لكلام هانتر وجرأته وباين عليه مصمم يعرفه، راح مع أخته لوالدينهم يتغذون معاهم.
كورابيكا: انتين لاتشغلين بالش الحين وراجعي للامتحان.
كيرا: أكيد خله يولي ماني مرسبة روحي عشانه.
الوالد: ليش تأخرتون؟
كورابيكا: مسافة ميل علينا نمشي ليما نوصل لهني.
الوالدة: تسوون رياضة شوي.
كيرا: كلما تنقلنا من غرفة للثانية سووينا رياضة مشي.
الوالد: أحسن لكم.. شلون دراستش اليوم؟
كيرا: تمام.

أليسا بعد ماكملت مراجعتها راحت لاخوها اللي كان بالصالة الرياضة، دخلت عليه وسمعته مشغل أغنية رومانسية.
أليسا: تنزل وزنك زيادة بتصير هيكل عظمي.
كونر: عادي، كملتين مراجعتش؟
أليسا: من زمان، قلت ايي أونس روحي معاك بعدها رد براجع.
كونر: أبوي وأمي ما بيطلعون؟
أليسا: مادري بس كأن في افتتاح لمعرض مادري شنو بالليل.
كونر: مافي شده بعد أروح كفاية من الصبح قعدني أبوش وخرب نومتي.
أليسا: ليش ماتنام الحين بدال ماتنزل وزنك زيادة عن اللزوم.
كونر: شكلي بسويها عشان أبوي ما يجرني معاه، صدق ذكية.
بهاي الوقت يى لهم الخادم.
الخادم: سيد كونر والدك طالبنك.
كونر: بل من طريناه جى لنا.
ضحكت: روح لا يعصب عليك.
كونر: قصدش أروح أنام أريح لي.
أليسا: أني مايخصني إذا سوى فيك شي، أروح أراجع أحسن لي.
مشوا مع بعض، أليسا راحت لدارها أما كونر راح لمكتب أبوه.
كونر: نعم يبا.
الوالد: انت وين تروح؟ مو قايل لك خلك هني.
كونر: مليت من القعدة هني رحت أسوي رياضة.
الوالد: المهم برز روحك الساعة 7 ماشين، مو تتأخر.
كونر: وين بعد؟ ماكملنا من الاجتماعات.
الوالد: مادري انت شنو بتسوي عقبي.
ابتسم: كل اللي علمتني عليه.
الوالد: الحين قوم جهز روحك لانتأخر.
كونر: Ok، دقايق وأجهز.
الوالد: ولا ساعة عشان تجهز.
كونر: مو مشكلة خلهم ينطرون.
غمز لأبوه بعدها راح لداره يسبح.
المستشار: ماله داعي تخاف عليهجين، كونر ذكي ويعرف يتصرف بكل شي.
جين: ادري فيه ما بقصر بالشغل، لكنه كل يتحرطم.
المستشار: لكن شوف شغله شلون يكون عقب، كأنه انت.
جين: كلامك صح.. المهم وين الملف اللي خبرتك عنه؟
المستشار: هذا هو فيه كل اللي طلبته.
بعد فترة من شغله راح لداره يجهز روحه، وقبل لا يطلع مع ولده راح يطمن على بته.
مر الأسبوع بسرعة والشباب نجحوا بالامتحان بعلامة كاملة بعد، هانتر سكت عن السالفة لكنه مانسى يبي ينتظر ليما يجي الشاب بنفسه يعترف وليما هو بعد يعرفه، بهاي الفترة تحسنت علاقتهم مع جوي وحتى كايبا وصاروا معاهم ربع، الفصل الأول مابقى شي وينتهي وقربت معاه الامتحانات النهائية.
بالـbreak اجتمعوا الشباب مع بعض بالكافيتيريا.
أليسا: ما بقى شي عن النهائي.
كيرا: لا ذكريني.
بليك: بقى تقريبا بس أسبوع و نبتدي.
هانتر: أقول إنما سكيتون السالفة ترى بقوم عنكم.
بليك: بنغير السالفة بس انت اقعد.
كيرا كانت تقرأ الإعلان لما قاطعتها يد أليسا.
أليسا: هوي، وين راح عقلش؟
طالعتها بنظرات غريبة: طار، شدراني فيش أقرى الإعلان.
أليسا: لا بس حسبته راح إلى الــ.
كيرا فهمت شنو تبي تقول وضربتها بريلها.
هانتر وبليك فهموا شنو كانت أليسا بتقول وابتسموا لتصرفها وردة فعل كيرا عليها.
هانتر غير الموضوع: بتروحون الحفلة؟
كيرا + أليسا: مادري.
بليك: هاي المرة بجمعون الكل أول وثاني وثالث عكس اللعام.
كيرا: هاي السنة غيروا وايد.
هانتر: اهمشي بسوون حفلة فيها رقص خلاص الباقي مايهمنا.
ابتسموا.
أليسا: عاد أي فرقة؟
بليك: ما يتكلمون إلا وقت الحفلة.
هانتر: بجون معانا؟
اكتفوا بس بهز راسهم بأي، بعدها ردوا للصف.

هاي الحفلة تنكرية لأنها تصادف مع عيد الهالوين وبعد بمناسبة نهاية الفصل الأول، وعشان يشجعون الطلاب ويحفزونهم أكثر يكرمون الطلاب اللي حاصلين على نتايج عالية، وبالإضافة لهذا في فقرة مخصصة للرقص.
مرة فترة الامتحانات بسهولة على البعض و صعوبة على الباقي، لكن شبابنا سووا قد اللي عليهم ويتمنون يجيبون أعلى الدرجات، لكن الحين أعصابهم بعدهي ماتهدأ وشلون بتهدأ وهم ينتظرون الشهادات على حر من الجمر.
يوم السبت اجتمعت عايلة بوتر بقصر جين.
كيرا: مرحبا عمو.
جين: مرحبتين، كيفك حبيبتي؟
كيرا: تمام، وأنت أخبارك؟
جين: بخير بشوفتش حبيبتي.
كورابيكا يكلم أخته مستغرب: تعالي انتين من وين متعلمة كلمة عمو؟
كيرا: من المسلسلات اللبنانية صح عمو؟
جين: أيو صح يبتي.
كونر: لا رايح فيها الوالد.
كورابيكا: من متى أتابعون هاي المسلسلات؟
كيرا: ذاك اليوم أنطقطق بالتلفزيون وطلعة لنا قناة لبنانية حاطه مسلسل طالعناه.
كورابيكا: عمو مو حلوه عمي أحلى.
كيرا: بالعكس عمو أحلى بوايد من عمي، عمي كأنك تنادي على عنز.
ضربها عمها بالخفيف على يدها: الحين أنا عمش تقولين لي عنز ذلفي مناك أشوف.
كيرا تحاول تمسك روحها عن لا تضحك: لا عمي مو قصدي انت.
أبو كونر: لاه كمن عم عندش؟
كيرا تطالع حواليها: واحد قمر وش حلاته.
أبو كونر: إي الحين صرت قمر، من عنز لقمر.
قالها بطريقه خلى الكل يضحك.
كيرا حبت راس عمها وخده: فديتك حبيبي وروحي وكل حياتي ماقدر على زعلك مني، كل من كورا مايفهم لازم نييب له مثال.
كورابيكا طالعها بنظرة على انه مو مهتم بكلامها.
عمها حط يده على كتفها وحضنها: خلاص حياتي سامحتش.
أليسا: كيرا بسش مغازل ترى أمي تغار.
ضحكوا.
أبو كونر: خل تغار بت اخوي أولى منها.
جوزيف طالعته لكنها ماردت عليه.
كيرا: خالتي أني مالي دخل ريلش هو اللي يغازلني.
كلهم ضحكوا على كلامها.
هاري: الحين لا فديتني ولا فديتك وبسكم مغازل بعض خلونا ندخل تراني ثلجت من البرد.
دخلوا كلهم للقاعة وظلوا يتكلمون، كالعادة الكبار بالسياسة وزوجاتهم عن مجالس المرأة والشباب ينعزلون عنهم لكنهم قعدوا بوحدة من الغرف بدال الحديقة بسبة الأمطار.

عموم بايبر مجتمعين عندهم اليوم ، البنات قاعدين بروحهم يتكلمون.
قبل لاندخل بكلامهم خلوني أعرفكم على عمومها.
1-زاندر: أبو بايبر عمره 46 يدير شركة هالويل للمعاملات الخارجية مع أخوانه، وهو صديق مع الملك من أيام الدراسة. عنده ولدين:
ليو 21 يدرس بجامعه أمريكا إدارة أعمال وبالإجازة يشتغل بالشركة، وأخته بايبر تعرفونها.
2- كلارك: أبو برو عمره 45 ، يساعد أخوه بإدارة الشركة، وهو صديق جين من أيام الدراسة، وعنده بعد ولدين:
لنك 21 يدرس مع ليو بالجامعة وثنينهم مقربين من بعض، وأخته برو تعرفونها.
3- دالس: 43 وعنده ولدين:
إميليان: 20 سنة يدرس بجامعه بفرنسا مايهتم بدراسته وايد و يشوف الحياة كلها سهله وان الدراسة ماراح تفيده هذا أكيد دام عندهم شركة، يحب يسوي كل شي على مزاجه وما يحب احد يأمره بأي شي.
مونكا: 17 سنة تدرس مع بايبر وبرو وهي متفوقة بدارستها، ما تحب تتكلم وايد يعني هادئة ومحبوبة عند الكل وتعتبر بايبر أختها لأنها وايد مرتبطة معاها، علاقتها مع أخوها مو زينة وايد هو دايما يعصب عليها حتى لأتفه الأسباب وأحيانا يضربها بدون ما احد يدري بس هي ما تخبر احد بهذا الشي، وحتى إذا يرد أخوها للبيت سكران ما تقول لأبوها، متعذبة بداخلها بصمت من أخوها إن خبرت والدينها بيذبحها فجذي تظل ساكتة عن كل بلاويه وتتحمل كل الألم.
4- ريم: 40 سنة عمتهم الوحيدة واصغر وحده وعندها 3 أولاد:
رينا 16 سنة تدرس بنفس المدرسة مع بايبر محبوبة ومأدبة ومتفوقة بدراستها.
إلياس15 سنة ، وناش 13 سنة.
بعد ما كملوا البنات كلامهم قاموا بروحون لأهلهم لأنه وقت العشى، وبالممر التقوا بالشباب.
لنك: أخيرا جيتون.
برو: اللي يسمعكم يقول انتون من زمان وصلتون.
ليو: شرايكم نتعشى برى؟
بايبر: لمى جهز كل شي تكلمتون.
رينا: لو قلتون من قبل أحسن.
لنك يكلم ليو: خلها لمرة ثانية نطلع من العصر كشته، خب الحين لا مدرسة ولا أخوها.
ناش: ولا جامعه بعد.
ضحكوا.
ليو: مو مشكلة شرايكم بكرة؟
إلياس: إذا رضوا الكبار بعدها مشنى وراك.
لنك: ما بقولون شي.
ليو: صح، شرايك إميليان؟
إميليان: عادي عندي.
إلياس: بقت القوات العظمى ( يقصد أهلهم).
ضحكوا عليه بعدها دخلوا لغرفة الطعام.

جين: تلقيتون دعوت العيد ميلاد اللي بسويها جون لولده مايكل؟
هاري: إي، بتروحون؟
إيثن: عليكم.
جين: تلقيناها من عنده شخصيا مو عدله ما نروح.
هاري: دام جذي نروح مع بعض.
إيثن: كم بصير عمره؟
جين: كأنه قد كونر أكيد بكمل 19 وبيدخل 20.
هاري: مرت السنين بسرعة، العيال كبروا وكبرونا معاهم.
إيثن: انتون كبرتون أنا توني شباب.
هاري: عشتوا، كم على بالك عمر كريس!
إيثن: توه 16 وسارة 14 وتوم 12.
جين: كبروا بعد شنو، صاروا رجال وسارة صارت مرا.
إيثن: إي لكن انتون كورابيكا وكونر 19، كبار بعد وانتون اكبر.
جين: خلاص درينا انك شباب توك بو 20 سنة.
إيثن: لو زين 20، آآخ راحت أيام الشباب.
هاري: زين اعترفت يولد العم.
إيثن: شنو نسوي ما بقى من العمر مثل ما مضى، وما بقى علي شي وادخل الـ40.
جين: انت توك بتدخلها وياي أما هاري من زمان دخلها.
هاري: أي من زمان توني سنتين من دخلت.
إيثن: خلونا من هذا وقولوا، متى ناوين تزوجون كورابيكا كونر؟
جين: توها الناس عليهم.
عمى هم يتكلمون يو لهم زوجاتهم وظلوا يسولفون مع بعض.
بغرفة الشباب سوالفهم وضحكهم عمره ما بخلص.
كريس يكلم كونر: يوم واحد بصيدونك ويا ويلك منهم ذيك الساعة.
كونر: No problem .
أليسا رن تليفونها: هلا بالقاطعين.
المتصل: محد قاطع غيرش، ما فيش خير تتصلين.
أليسا: ما علي أني ما فيني خير، بذمتش مين كل مره يتصل لش.
المتصل: امممم انتين حبيبتي، انزين شلونش شخبارش؟
أليسا: بخير نسأل عنش؟
المتصل: سألت عنش العافية، سمعي اتصلت عشان ابشرش، أختي جوانا حامل.
أليسا: صج، سوسنو بلى مزاح.
سوسن: لا هاي المرة صدق توها بشهرها الثالث.
أليسا: ألف مبروك، من كثر مادعين عليها متى تحمل كاهي حملت روحي يابليها الحين.
سوسن: ريلها ما خل شي ما سواه لها بس عشان ما تتحرك وايد.
أليسا: أكيد ميت عليها.
سوسن: كأنش مو ميته على بليك (نعمت صوتها لما قالت اسمه).
أليسا: حدش عاد عن الغلط، مو زين لليهال يتكلمون بهاي السوالف.
سوسن: مشكل عليش يالمرا، أقول ذلفي عني يزات الخير متصلة لش، بتصل لكيور ابشرها.
ضحكت: عادي محد قال لش تتصلين.
سوسن: صدق مافيش خير.
أليسا: خلاص sorry.
سوسن: المشكلة ما قدر ما اسامحش.
أليسا: ادري.
ضحكت: يلى بتصل لكيور الحين.
أليسا: ماله داعي تتصلين لها، كيور على قولتش قاعدة يمي.
سوسن: صدق، ليش ما قلتين من قبل، عطيني إياها.
أليسا: أذوني امبيها (كلمت كيرا) يودي.
بما إن كيرا قاعدة يم أليسا قدرت تسمع اللي دار بينهم وهي تضحك عليهم: انتين وياها فار وسنور.
كيرا تكلم سوسن: هلا بالقمر والنور هلا بالزهور والياسمين، شخبارش حبيبتي؟
تعمدت تقول جذي عشان تغيظ أليسا.
سوسن: هلا فيش حبيبتي عاش من سمع هالصوت وردت له الروح، بشريني شخبارش؟
ظلوا يتكلمون لفترة والباقي يسولفون.
كونر يكلم كورابيكا: الحين كل هالوقت يتكلمون ما ملوا من بعض بكملون ساعة.
كورابيكا: انت بس شوف شكل أختك معصبه عدل.
ضحكوا وأليسا شافت نظراتهم: على شنو تضحكون (كلمت كيرا) وأنتين بسش عاد ييبي تليفوني.
أخذته من عندها: سوسنو ما..
سكتت وطالعت تليفونها بعدها طالعت كيرا اللي تضحك عليها.
أصلا كيرا من حوالي نص ساعة بندت عن سوسن وكانت تكلم روحها بس عشان تغيظ أليسا.
أليسا بعصبية: يالكريه بس من مساعه للحين تكلمين الهوى.
كيرا وهي تضحك: قولي اشوه محد اتصل.
أليسا قامت وطلعت من الحجرة وراحت تتمشى بالقصر.
سارة: ما بتكلمينها؟ شكلها عصبت عليش واجد.
كيرا: لا تخافين بترد لش بعد نص ساعة ولا كأن صاير شي.
سارة وأخوانها استغربوا من ردها.

اليوم مجتمعه عايلة هانتر وبليك عندهم.
خلونا نتعرف على أخوان هانتر أول:
1-بون 26 سنة وعنده ولد وبت، طوم 4 سنين و أليسون سنتين.
2- جيمي 24 سنة عنده ولدين نيك 4 سنين و زاندر سنتين وزوجته حامل بشهرها السابع.
3- فيدا 23 سنة عندها بت جودي 3 سنين دايما متعلقة بهانتر وتحبه لدرجة كبيرة، وحاليا هي حامل بشهرها السادس.
أخوان بليك:
1- براون 26 سنة عنده ولدين وبت داني 5 سنين، جيسي 3 سنين وميشيل سنتين.
2- جاك 24 متزوج فيدا أخت هانتر.
3- سام 22 سنة عنده ولد ستيف سنتين وزوجته حامل بشهرها الرابع.
جاك يكلم هانتر وبليك: خلاص الحين شهر كامل تعطلون فيها.
بليك: لا بعد ما ناخذ الشهادة بنرتاح.
جيمي: متى بكون؟
هانتر: بعد ثلاثة أيام.
أبو هانتر: أكيد ناجحين.
بليك: 100%، لكن مانبي مجموعنا ينزل.
ظلوا يتكلمون معاهم شوي بعدها راحوا غرفة الألعاب يشوفون صغار العايلة، قعدوا يلعبون معاهم شوي بعدها طلعوا.
بليك: إنصمت أذوني من صراخهم.
هانتر: جهال وشايفين بعض تبيهم يقعدون لك ساكتين.
بليك: ماقلنا شي عاد بسهم سنويا يجيبون ما ملوا.
ضحك: بنشوفك إذا تزوجت كم واحد بجيب.
قاطع كلامه جيت جودي لخالها و معاها المربية.
جودي: تالي بتعد معات.
هانتر حملها: تعدي معاي ( كلم المربية) روحي بخليها معاي.
استأذنت منهم وراحت.
بليك: تعالي لعمي.
جودي: ماني امبي تالي.
يودت هانتر بقوة من قميصه.
بليك: بس خلاص ما نبيش (يكلم هانتر) مادري ليش كل لاصقه فيك، كأن ماعندها خال غيرك.
ابتسم: الحين انت بتغار من بت أخوك.
قعدها على حافة البلكونه ويودها بقوة عن لا تطيح.
بليك: مين قال إني أغار منها!
هانتر يلاعب جودي: حبيبتي انتين، تحبين مين خالي أو عمي؟
جودي: تالي، عمي تيتان.
بليك: الحين عمش صار شيطان شوفي بعدين مين بجيب لش الحلاوة.
جودي: تالي بتيب لي حلاوة، تح!
هانتر: تح حبيبتي أجيب لش الحلاوة وأبوها بعد، الحين انت بتحط دوبك بهاي الجاهلة.
جودي: تالي امبي تلفون.
هانتر عطاها تليفونه تلعب فيه.
بليك: الحين عرفت ليش كل لاصقه فيك عشان هالتليفون.
بليك توه بيمشي.
هانتر: تعال انت وين بتروح؟
بليك: بتصل للقمر اليوم ماسمعت صوتها.
هانتر: عجل روح عشان تعدل مزاجك شوي.
بليك: أكيد بروح، يعني بنتظرك ليما تقول لي، انت بس خلك هني جابل القطوه اللي عندك.
هانتر: هاي قمر مو قطوه، وأنت..
دار بشوفه لقاه من زمان مشى، بقى يتكلم مع بت أخته ويلاعبها.
عمى أليسا تتمشى بالقصر رن تليفونها: ألو.
بليك: هلا بالغلى كله، شخبارش حبيبتي؟
أليسا: زينه.
بليك حساها مضايقه: ألس شنو فيش؟ صاير لش شي؟
أليسا: توك ذاكرني.
بليك: آسف حياتي انشغلت اليوم مع أبوي إلا يبي يعلمني الشغل ومادري شنو اسمه، واليوم المغرب جينا لبيت عمي، ما مداني شي حدي طرشت لش مسج، يلى عاد حبيبتي سامحيني.
ابتسمت: خلاص سامحتك.
بليك: عمري انتين وحياتي وكل هلي.
خجلت من كلامه و ظلت ساكتة.
بليك: افف لازم يعني، بسش خجل حياتي.
ابتسمت لكنها ما تكلمت وهو اطر يغير الموضوع بس عشان يسمع صوتها.

الساعة 10 ردت أليسا كريس و أخوانه طالعوا الساعة وكان بالفعل بعد نص ساعة ردت استغربوا لهاي الدرجة كيرا تعرف أليسا.
أليسا: Sorry تأخرت عليكم؟
الكل: No.
كيرا: درتين القصر كله!
أليسا: تقريبا، شكبره البيت تبيني أتكسر.
كيرا: عادي مافيها شي.
طالعتها بعدها حقرتها وظلوا يتكلمون لين يى وقت العشى.

بطريق هانتر وبليك وجودي لغرفه الطعام.
بليك: ما بتكلمها؟
هانتر: بعدين قبل لا أنام اكلمها.
بليك: إي لازم أتصبح فيها وتمسي عليها.
هانتر: أحسن، عن لا اتصل لها بوقت مو مناسب، وأحيانا قبل لاتصل أطرش لها مسج.
بليك: أكيد اتسهرها.
ضحك على كلامه ودخلوا للقاعة.

بعد العشى بفترة اجتمعت العايلة كلها بالقاعة ماعدا جين وكيرا اللي قعدوا بالحديقة بعد ما وقف المطر.
بعد فترة طلعت أليسا مع سارة يتمشون.
أليسا لاحظت سارة شارد ذهنها: سارة شنو فيش؟
سارة: لا ولاشي بس..
أليسا: بس شنو؟
سارة: ألس ممكن سؤال؟
استغربت: تفضلي.
سارة ترددت بالبداية: انتين تغارين من كيرا؟
تفاجأت أليسا من سؤالها: ليش تظنين جذي؟
سارة: مادري بس..حسيت بأنش تغارين منها، يمكن لأنها تقعد مع أبوش أو ..
ماعرفت شنو تقول.
أليسا ابتسمت: سارة أني اعتبر كيرا مثل أختي صدق أحيانا نتشاجر مع بعض مثل ماشفتين مساعه لكن عقب ننسى كل شي ونرد وي بعض، سارة أني ما أغار من كيرا ولا شي بالعكس مستانسه وفرحانة لها من كل قلبي.
سارة: كنت متأكدة من هذا ثنتينكم تتصرفون كأنكم خوات.
أليسا: مو قليلة السنين اللي قضيناها مع بعض، بكل يوم كنت أتعرف على شي جديد بكيرا، مو غريبة عليش إذا قلت لش إني طول عمري ماعرفت بت نفس كيرا طيبة قلبها رقة مشاعرها كلامها تخلي الواحد ينجذب لها، ما بقول لش كل هذا لأنها بت عمي لا هذي شخصية كيرا جوهرة نادرة بالوجود ما بتلقينها بكل مكان...إذا بغيتين احد يكتم اسرارش هي أفضل كتومة، محد يقدر يفهم كيرا عدل حتى أني أحيانا ما فهمها.
استغربت: لكني ظنيتكم تفهمون لبعض عدل.
أليسا: مو كل الأوقات ..دايما ألقى بعينها نظره غريبة تحيرني ما قدر افهم معناها.
تعجبت: نظرة شنو؟
أليسا: للأسف جواب سؤالش مو عندي، هاي النظرة سر من أسرار كيرا محد يعرف معناتها إلا هي.
سارة: دام انتون ما تخفون عن بعض شي ليش (انتبهت سارة لكلامها) آسفة ما كان لازم..
قاطعتها: ماله داعي انتين ما قلتين شي غلط، واني فاهمه شنو تبين تقولين، سر كيرا ماقدر أقول لش غير انه مجهول الهوية حتى بالنسبة لكيرا.
ما فهمت كلامها: تقصدين إنها ما تعرف عنه.
أليسا: على حد علمي إي.
ظلوا ساكتين شوي وسارة تحس ذهنها مشوش.
أليسا: لو كلير عايشه هي بتقدر تجاوبش على هاي السؤال.
سارة: التوائم يفهمون بعض بسرعة.
أليسا: كيرا وكلير ما كانوا مجرد توأم، كانوا أكثر من هذا بوايد يتواصلون أحيانا بالعين واذكر إذا وحده منهم بغت شي على طول تفهمه الثانية ولما يتكلمون يكملون على بعض، الكل كان مستانس لهم دايما يجمعونا مع بعض أني وكورا وكونر وستيف من نشوف بعض ما نفترق وكلهم كانوا حوالينا مستانسين من لمتنا بس القدر غير كل شي وأخذها هي وستيف بعيد عنا.
سارة تأثرت من كلامها لكنها ماعرفت مين ستيف: الأقدار تعكس لنا مجرى الماي.
أليسا: تعكسه بأخذ الأحباب.
أليسا تذكرت أيام طفولتها مع الكل: ليت الزمان يرد، ويرد لنا كل اللي فقدناهم، بعدها بتلقين جواب لكل اسألتش مع كلير.
سارة: الظاهر كيرا تأثرت وايد لفقدها.
أليسا: ما ظل احد بالعايلة ما تأثر، لكن مو مثل كيرا لو تلاحظين لحد الحين كيرا تتذكرها عمرها ما نستها ومستحيل تنساها صدق أبوي خفف عنها لكن.. جروح كيرا للحين ما تلتئم، تحاول تخبي عن الكل ألمها عشان ما تذكرنا فيها لكن كلير حاضره معاها بكل وقت ولحظة ..مو سهله تنسى شخص انولدت وعشت معاه نص العمر، بعدها يرحل بدون حتى ما تودعه.
سارة تألمت لكلامها وطالعتها شافت نظرها على النافورة اللي تحت كأنها تتذكر لما كانوا يلعبون حواليها: مسكينة كيرا ما تستاهل كل اللي صادها.
أليسا: محد منا يستاهل يعيش بعذاب فراق توأمه.
سارة ما فهمت شنو قصدها لكنها حست أن أليسا عانت بشي قبل لكنها تخفيه: ألس فيش شي؟
أليسا تحاول تخفي ألمها ورا ابتسامتها: لا ولاشي.
عمى هي تطالع سارة شافت أبوها وكيرا يايين ناحيتهم: اكو ردوا أخيرا.
سارة طالعتهم بعدها طالعت أليسا: مشكورة ألس بكلامش جاوبتين على كل اسألتي.
ابتسمت: ما سويت أي شي عشان تشكريني.
سارة: بتخبرين كيرا؟
أليسا: إذا كان يضايقش لا تخافين سرش فبير.
سارة: لا مايضايقني لكن أخاف تأخذ صورة ثانية عني.
أليسا: شنو هاي الكلام كيرا بت خالش وانتين تعرفينها، ماتحكم على الشي بسرعة، أوعدش إني ما بخبرها.
بهاي الوقت وصل جين مع كيرا لهم.
جين: شنو مقعدنكم هني؟ الجو بارد.
أليسا: نسولف، تعالوا انتون رادين للجماعة؟
كيرا: Ya عندش مانع.
أليسا: لا بس مو متعودين عليكم، ساعة ما خذيتون.
كيرا ابتسمت: طالعي ساعتش عدل بتصير 1.
أليسا: صوبه، ما حسينا بالوقت.
جين: أكيد دام شايفيين بعض، وين بتحسون فيه؟ صح خالي!( يكلم سارة).
سارة كانت تسمعهم وتطالع كيرا تفكر بكلام أليسا: إي صح.
توهم بيدخلون للقاعة رن تليفون كيرا وكان مسج من هانتر

جين يكلم كيرا: يلى امشي لا تثلجين.
كيرا: بتصل أول بعدين بدخل.
جين: Ok لا تتأخرين.
ابتسمت له وراحت قعدت عند الكراسي واتصلت لهانتر لكنه قطعاه، استغربت كيرا بس بعد اقل من دقيقة اتصل.
كيرا: ليش تسكه بويهي؟
هانتر: عشان مرة ثانية تتأدبين و طرشين مسج وأنا اللي بتصل مو انتين.
ضحكوا.
هانتر: فديت هالضحكة وحشتني شوفتها، شخبارش حبيبتي؟
كيرا: بخير وأنت؟
هانتر: اللي يسمع صوتش أكيد بترد له الروح، عسى ما قاطعتش بشي؟
كيرا: لا ما عندي شي.
هانتر حس فيها شي: كيرا علامش؟
كيرا: ولا شي بس بردانه، حدي مثلجه.
استغرب: وين قاعدة انتين؟
كيرا: برى صار لي 3 ساعات تقريبا.
هانتر: 3 ساعات مجنونه انتين ناوية تمرضين دخلي بسرعة لا تتثلجين أنا طالع الحين وثلجت بعد مو انتين، شنو كنتين تسوين حضرتش؟
استانست لأنه خايف عليها: كنت مع عمي اسولف وما حسينا بالوقت.
كيرا سمعت صوت بنية مع هانتر تصارخ، استغربت.
هانتر : بس خالي خلاص قعدي هني، شاطرة.
البت: امبي التلفون.
هانتر: بعدين، ألو كيرا.
كيرا: معاك، مين وياك؟
هانتر: هاي بت أختي جودي دايما معاي.
ارتاحت كيرا وظلت تكلمه بعدها دخلت لداخل.
بعد حوالي ساعة وشي الكل طلع عشان يردون لبيتهم.

كلهم كانوا يتكلمون ماعدا سارة ساكتة.
فيبي: سويرة شنو فيش؟
سارة: ولا شي بس تعبانه شوي.
إيثن: الحين إذا وصلنا ارتاحي.
سارة: إي.
توم: أنا بنام.
إيثن: ما بقى شي ونوصل.
سارة: ماما.
فيبي: نعم.
سارة ترددت شوي: في احد بعايلتنا اسمه ستيف ومات؟
فيبي وزوجها انصدموا أما أولادهم استغربوا.
إيثن: مين قال لش؟
سارة: ألس قالت اسمه واللي فهمته انه مات.
فيبي وزوجها زادت صدمتهم.
كريس: ستيف! من هذا يما؟
إيثن: شنو قالت لش بعد؟
سارة استغربت: ولا شي.
فيبي: انسوا السالفة مامبيكم تجيبون طاريها قدام احد خصوصا ألس وكيرا، فاهمين.
استغربوا أولادها.
سارة: ليش عاد؟
فيبي: مامبي أي نقاش بهاي الموضوع سوو اللي قلته لكم وخلاص.
إيثن: ما مبيكم تفتحون هاي الموضوع مع ألس أو كيرا أو أي احد ثاني.
سارة و أخوانها استغربوا من تصرف والدينهم وليش بالتحديد ما يبونهم يفتحون السالفة مع كيرا وأليسا.
أليسا قاعدة بدارها بعد ما غيرت ثيابها انبطحت على السرير وطالعت صورة محطوطة على الطاولة مسكتها وظلت تطالعها صورتها مع أخوها ومعاهم ولد ثاني عينها ماشالتها عنه تتذكره وتتذكر طفولتها معاه: ستيف ..اشتقت لك وايد.
نزلت دمعه على خدها و ما قدرت تمنع نفسها من تغمض عينها وتشوف أيام طفولتها مع ستيف.
ستيف من يكون؟ وليش فيبي وزوجها حذروا أولادهم لا يفتحون الموضوع قدام أليسا وكيرا؟ شنو علاقته بأليسا ؟
هذا كله بنعرفه بباقي الأجزاء.

إحصائية العضو

اوسمتي

 
مجموع الاوسمة: 1

الساعة 1 وشي لما قعدت كيرا على رنة تليفونها.
كيرا: ألو.
المتصل: اهلين، شخبارش؟
كيرا: تمام، وأنت؟
المتصل: بخير، توش قاعدة؟
كيرا: إي ردينا أمس متأخر من بيت عمي.
المتصل: عجل اخليش تكملين نومتش.
كيرا: خلاص طارت النومه.
المتصل: متأكدة مو أنا اللي طيرتها.
كيرا: لا لا، لحظة شوي.
دخلت عليها خدامتها نينا: صباح الخير.
كيرا: صباح النور.
نينا: سيد هاري طالبنش؟
كيرا: شنو يبي؟
نينا: مادري.
كيرا: بروح له بعد شوي.
طلعت نينا، كلمت كيرا هانتر شوي بعدها راحت لأبوها.

أليسا تتكلم مع بليك بالتلفون و قطع عليهم دخلت أخوها.
كونر: من هذا اللي بشوفينه بعدين؟
أليسا: حشى مو أذون ذي صوبه سمعت، لا يكون مركب لي بالحجرة سماعات تجسس واني مادري.
كونر: فكرت اركب بس نشفت، ما قلتين مين؟
أليسا: بليك.
كونر: وين بشوفينه؟
أليسا: نسيت اليوم عندي درس نينجا.
كونر: إي احسب بعد.
أليسا: شنو؟
كونر: قلت يمكن تشردين معاه أو شي.
ضحكت على كلامه وظلوا يتكلمون لفترة.

سارة قاعدة يم الدريشة بغرفتها تفكر لما دخل عليها كريس.
كريس: شنو فيش؟
سارة: ولا شي.
كريس: شكلش يقول غير، أكيد عن ستيف صح؟
طالعته: تقريبا، امبي اعرف ليش ما يبونا نفتح معاهم الموضوع.
كريس: أكيد السافلة فيها إن.
سارة: شرايك نسألهم مرة ثانية؟
كريس: شفتين ردهم أمس شلون، ماظن تبين صدق تفتحينه معاهم.
سارة: كلامك صح، شكلهم تضايقوا لما خبرتهم.
كريس: شلون ألس قالت لش.
سارة ترددت شوي.
كريس: شنو فيش؟
سارة: عدني ما بتقول لأحد.
استغرب: ليش؟ شنو السالفة؟
سارة: عدني أول.
كريس: اوعدش ما بقول لأحد، تكلمي شغلتين بالي.
سارة: أني وألس كنا نتكلم عن كيرا أمس.
خبرته بكل اللي دار بينهم و هو تعجب من اللي سمعاه.
سارة: خل سالفة ستيف بجه وقول لي، كلام ألس صح أو إنها تجذب علي؟
كريس: لا ما ظنها تجذب.
سارة: لكن مو معقولة كيرا ما تفهم نفسها وهي تفهم الكل.
كريس: لا سارة انتين فهمتين غلط ألس قصدها يمكن كيرا تعرف ويمكن لا، ما حددت بالضبط.
سارة: أني فاهمة لكن ما ظن في احد بالدنيا ما يفهم نفسه كثر ما يفهم غيره، لكن تكون كيرا ما صدق.
كريس: بلى في سارة مو كل الناس تفهم نفسها كثر ما تفهم لغيرها، أما كيرا فسرها مثل ما قالت لش ألس مجهول الهوية خليه مثل ما هو.
فكرت سارة بكلامه وبينت له إنها فاهمه قصده، بعد ما طلع كريس من عندها كل تفكيره بكيرا وكلام أليسا.

بطريق كيرا لمكتب أبوها تفكر شنو يبي منها بالضبط، دخلت لقته يتكلم بالتلفون وأشر لها عشان تدخل.
هاري: أكي جت( كلم بته) for you .
كيرا استغربت مين بيتصل لها على تلفون أبوها، أخذت السماعة: ألو.
المتصل: ألوين ما بغينا نسمع هالصوت، شخبارش حبيبتي؟
كيرا: اهلين عمي جون، أني تمام وأنت أخبارك؟
المتصل كان رئيس أمريكا جون مارشال: بخير حبيبتي، كلما اتصل لأبوش و اسأل عنش يقول مشغولة أخيرا حصلناش؟
كيرا: انشغلت بالدراسة والامتحانات.
جون: بشري كم نسبتش؟
كيرا: باقي يومين.
جون: لا تخافين متأكد الأولى.
ابتسمت، ظلت تتكلم معاه وأبوها يطالع بته ومبتسم لفخره فيها.
الساعة 4 بالضبط وصلت كيرا وأليسا لمدرسة النينجا، والتقوا بهانتر وبليك.
هانتر: شخباركم؟
كيرا + أليسا: تمام وانتون؟
هانتر + بليك: تمام.
بليك: إلا جايين وي الوقت بالضبط.
كيرا: شنو نسوي، الست أخرتنا.(تقصد أليسا)
أليسا: امشي قدامي وبسش سوالف بعدين بشوفينه.
بليك: منتين ناوية تشوفينا؟
أليسا: لا بس ما نبي نتأخر على الدرس، باي.
كيرا: نشوفكم عقب.
كل واحد راح ناحية صفه.
بليك: مرة ثانية يبي لهم يجون قبل ساعة.
هانتر: بل تنقعهم هني.
بليك: لا بآخذها بفره معاي.
هانتر: ناوي على عمرك.
بليك: ليش؟ شنو بسوي يعني؟
هانتر: أنت ما شفت الجيش اللي معاهم، شلون بتاخذها بفره بدون ما تقول لأبوها على الأقل.
بليك: افف صدق ابتلشنا لما صارت من عايلة الملك.
ضحك عليه ودخلوا لصفهم.

كورابيكا قاعد بداره يكلم بايبر.
كورابيكا: افف صدق حاله.
بايبر: لا تخاف بيي يوم و بشوفني قدامك.
كورابيكا: ومستحيل اباعدش عني.
بهذا الوقت دخل كونر فجأة عليه: Surprise .
كورابيكا: شنو اللي جابك؟ ماتعرف تطق الباب قبل لاتدخل.
كونر: افاا ولد العم ما بترحب فيني أول.
كورابيكا: السموحه ياخي مو قصدي، كنت مشغول بالتلفون وأنت فاجأتني، تعال أستريح.
كونر ظل واقف يم الباب ومسوي روحه زعلان: إي الحين صرت أخوك، أنا ماشي أحسن لي وأنت أرضع بالتلفون.
كورابيكا: تعال عاد أنا اقدر على زعلك، كم ولد عم عندي.
كونر: المصيبة واحد (طالع نظرات كورابيكا عليه) خلاص سامحتك افف.
ابتسم: إي جذي خلك والحين أستريح خليتني أتأخر على الرجال.
كونر بسخرية: أونه رجال.
ظل يتكلم مع بايبر شوي بعدها أطرت بايبر تسكه لأنها راح تطلع مع أخوها و أولاد عمها.
كونر: امبي اعرف كم مرة باليوم تكلمها؟
كورابيكا: مادري ما حسبت، أنت أكيد طول اليوم؟
كونر: لا مو طوله يعتمد، انزين خلنا من هاي السالفة وقول لي من صجك ناوي تشرد!؟
كورابيكا: إي ما فيها شي ساعة وراد محد بحس.
كونر: ما فيها شي إلا فيها بلاوي، ما فكرت يمكن برى يكشفونك شنو بتسوي يحضي؟ و هالعصابات اللي بالشوارع تدري إذا عرفوك شنو بسوون فيك؟
كورابيكا: أنت مكبر السالفة وهي صغيرة، من وين جبت لنا العصابات كل الخير اللي موفرنه لهم أبوي وبعد في عصابات.
كونر: إي في ليش لا، ناس طماعين يبون أكثر وإذا شافوك أكيد بيخطفونك وبهددون أبوك شدرانا عقب شنو بصير لك.
كورابيكا: تراك واجد متأثر بالأفلام أنا الحين جاهل بجودوني من هني والطريق، بعدين مين قال لك إني بطلع جذي أكيد بتنكر وما راح يعرفوني.
كونر: المشكلة مخك يابس مجيم لو قعدت من اليوم لبكرة أقنعك ما بتقتنع.. ادري فيك من يدخل شي بمخك شنو يطلعه عقب.
كورابيكا: بجي معاي أو لا؟
كونر: إي أجي وياك عشان إن صاداني أبوي يقص راسي.
كورابيكا: كيفك، إذا تأكدت إنهم ناموا بشرد.
كونر: إذا صادوك أو كشفوك احد من الحراس شنو بتسوي؟
كورابيكا: لا تخاف ما بشوفوني، بشرد من الممرات السرية.
كونر: تعرف لوين بودونك؟
كورابيكا وقف يم الدريشة وكونر لحقاه: شوف ذيك الغابة فيها بئر قديم بطلع منه، قبل ما أروح بحط مواسد تحت الفراش احتياط.
كونر: مجهز روحك لكل شي.
كورابيكا: بعد شنو تبي الاحتياط واجب، ما بتغير رايك؟
كونر: مادري.
كورابيكا: انت بس سو نفسي وما بصيدونك.
كونر: بفكر وإذا بروح بخبرك.
دخلوا عليهم امهاتم وغيروا السالفة.

بايبر: لنك و برو طلعوا؟
ليو: كأن إي.
بايبر: إميليان ومونكا ؟
ليو: اتصلت لإميليان مايرد.
بايبر: و مونكا؟
ليو: اتصلي لها انتين أحسن؟
بايبر: Ok .
اتصلت لمونكا: هلا موني.
مونكا: اهلين، شخبارش؟
بايبر: تمام، و انتين؟
مونكا: تمام.
بايبر: يلى جاهزين أو بعدكم؟
مونكا: لا روحوا بدونا.
بايبر: ليش؟
مونكا: تعبانه شوي ما لي زاغر اطلع.
بايبر: مونكا بلى دلاعه، إذا ييتين بتتغير نفسيتش صدقيني.
مونكا: بايبر صدقيني مالي نفس.
بايبر: لا تزعليني منش.
ليو اخذ التلفون من أخته: مونكا تعالي لا بنكنسل الطلعة كلها، يلى جهزي روحش دقايق و بنوصل لش.
مونكا: ليو ماله داعي.
ليو: مونكا تراش بزعليني منش.
مونكا: خلاص بجهز روحي.
ليو: إي خلش جذي الحين تعجبيني.
رد التلفون لأخته: مو تتأخرين وخبري أخوش بعد.
مونكا: إميليان طلع من زمان مع ربعه.
بايبر: شنو؟ هذا وإحنا قايلين له أمس، المهم انتين جهزي روحش الحين بنيي لش.
مونكا: Ok.
بعد ما سكت عنهم راحت تغير ثيابها ولما فصخت فانيلتها كان محطوط على ذراعها شاش شالته وطالعت ذراعها صاير لها اخضر من أثر الضربة، ما تقدر تحركها بسهوله دايما تألمها لكن حاليا خف الألم عن قبل.
وهاي سببها لها إميليان اليوم الظهر، راحت بتكلمه لكنه عصب عليها حتى قبل لا تقول له شي ضربها و طيحها على الأرض و انضربت يدها بحد الطاولة، وطلع بدون ما يفتكر لها.

ليو: قلنا له بنطلع اليوم يقوم يطلع من جهة ثانية.
بايبر: خله على راحته.
ليو: اهمشي موني بجي خلاص.
طالعته وضحكت.
الساعة 6.10 وصلت كيرا وأليسا لقصر الملك.
أليسا: محد بالصالة.
كيرا: أكيد بالمكتب و ذلاك بالحجرة.
راحوا لدارها حطوا بعض أغراضهم بعدها راحوا لغرفة كورابيكا.
أم كورابيكا: أخيرا ييتون.
كيرا: هلا ماما.
حبتها وقعدت صوبها.
كونر: خلصتون من الحزام الأبيض أو بعدكم؟
أليسا: خلصناه و عطونا شهادة والكورس الياي بنبتدي.

هانتر قاعد بداره يم الشرفة وفاتح الدريشة والهوا يدخل عليه ويلعب بشعره، وبيده صورة لكيرا قاصنها من المجلة ويحتفظ بكل صورها من المجلات حاطنهم بصندوق يفتحهم بمفتاح دايما معاه ويحطهم بالكبت ويقفل عليهم، عمى هو مندمج بالصورة ماحط باله بدخول ولد خاله روز.
روز بنفس عمر هانتر ويدرس معاه بنفس المدرسة، عصبي لكنه مرح، فوقت الجد يكون جاد لدرجة كبيرة وما يحب احد يملي عليه أوامره ويعتبر كلامه هو الصح دايما، و يغار من هانتر خصوصا لما يشوفه مع كيرا كلما يحاول يتقرب منها يفشل والحين غيرته مالها حد لان هانتر سرقها منه ويتمنى ينفصلون عن بعض عشان يحصل عليها.
روز تقدم منه: هي شفيك؟
هانتر طالعاه: من متى انت هني ؟
روز: توني من شوي، شنو اللي بيدك؟
هانتر انتبه للصورة اللي بيده بغى يخشها لكن روز سمتها.
هانتر: روز جيبها.
روز: لحظة عاد بنشوف مين ماخذ عقلك.
روز انصدم لما شاف صورت كيرا و هانتر استغل الفرصة وسحبها من عنده.
روز: من وين لك الصورة؟
هانتر ما عرف شنو يقول له هو يعرف شعور روز لكيرا شلون خصوصا بالسنتين اللي طافوا دايما كان يحاول يتقرب منها لكن كيرا تحبط كل محاولاته، والحين بهاي السنة من أول نظره بينهم تعلقوا ببعض وهذا يغيظ روز أكثر وأكثر.
غير هانتر الموضوع لأنه يعرف إن رد عليه ما بخليه بحاله: ما قلت لي عن أخبارك صار لنا فترة ما شفناك؟
روز مارد عليه ظل يطالعه وباين عليه شوي وبعصب: لا تغير الموضوع وقول لي من وين لك صورتها؟
سكت هانتر شوي وهو يشوف الشرار بعين روز: لازم تعرف؟
روز: إي لازم.
هانتر: شي يخصني ماقدر أقوله لك.
روز بسخرية: خاص فيك، أكيد قصيت عليها بكمن كلمه وعطتك إياها.
هانتر سكت عنه ما بغى يزيد معاه لكن روز مصمم.
روز: شنو تبي منها؟
هانتر عرف مين يقصد لكنه أنكر: مين تقصد؟
روز: لا تقعد تتمصخر علي، وجاوبني على سؤالي؟
هانتر: شنو اللي امبي منها!.. ما يخصك أنا حر باللي أسويه.
روز شوي وبعصب: تعرف مين اللي بصورة؟
هانتر: إي اعرف.
روز: تعرف شنو بسوي فيك أبوها إذا عرف انك تلعب على بته؟
هانتر: ألعب! مين قال لك إني ألعب عليها!..هذا عيبك روز تظن كل الناس مثلك ما تسوي شي إلا عشان مصلحتك، يعني انت على بالك بسوي نفسك بقص عليها بس لفلوسها؟..لا يولد خالي أنا ما أفكر ألعب وأقص عليها ولا عمري بفكر جذي وأنت، لو قعدت من اليوم لبكرة أقول لك ما بتقتنع.
روز: تكلم، بنشوف عقب.
هانتر: مو مشكلة أنا ما بخسر شي، انت ما تفكر إلا بمصلحتك وما يهمك احد غيرك تبي تتملك كل شي لنفسك ومحد ياخذه، جذي انت ما ربحت كيرا خسرتها لأنك طمعت بفلوسها وإنها بت الملك، و أنا فزت فيها لأنها دخلت قلبي بدون ما تستأذن مني استحوذت كل شي فيني ملكتني بكبري لها.
سكت روز شوي بعدها تكلم بسخرية: الحب! ليش ما قلت من البداية انك تحبها؟ أصلا ما في شي بالدنيا اسمه حبني واحبك عشان تحب، وكلامك ما يدخل بالمخ أصلا.
قام روز بيطلع.
هانتر: قلت لك من البداية ما بتفهمني وحتى لو فهمت ما بتعترف.
روز كان وده يتناجر مع هانتر لكنه يعرف بيطلع منها خسران، وحتى لو بالكلام هانتر أذكى منه وهو (روز) متسرع ويحكم على الشي بسرعة فما حب يكثر معاه الكلام وطلع من داره والنار شابه داخله.
بعد ما طلع فكر هانتر باللي سواه مع انه ما قال أي شي غلط لكن روز دايما يفهم السالفة بالمقلوب.
هانتر ما تعمق بالتفكير وايد و راح يشوف خاله ومرته يقعد معاهم شوي.

بعد ما كملوا الوالدين من شغلهم راحوا لعند زوجاتهم.
سوزان: أخيرا خلصتون؟
هاري: شفيش يمعوده معصبه؟
سوزان: محد بيرفع لي الضغط غيرك.
هاري: هدي بالش لا تعصبين.
سوزان: شلون ما تبونا نعصب وانتون من تشوفون روحكم كل بالمكتب مجابلين هالاشغال اللي ما بتخلص، بدال ما تقعدون معانا تونسونا تجابلون لنا الأوراق.
هاري همس لاخوه: لاه المرا اليوم موصله حدها.
جين: اسكت لا تزيد النار اللي فيها حطب.
جوزيف: شفيكم تتساسرون محنا عاجبينكم.
جين يهمس لاخوه: انتشرت العدوى (كلم مرته) سلامتش حبيبتي ما فينا شي، بس يعني عندكم العيال يونسونكم.
هاري: على طاري العيال فوينهم؟
سوزان: بدار السينما.
هاري: أوه زين، قوموا خلونا نقعد معاهم شوي، نشوف شنو يطالعون.
هاري وأخوه أخذوها حجه عشان ما يسمعون محاضرة زوجاتهم، لكنهم ما خلوهم بحالهم ولحقوهم لدار السينما.
بالأخص وراهم وراهم والله يعين عيالهم عليهم، صدق ساعات الكبار يردون لصغار، والصغار يتولون مهام الكبار، صح أو أني غلطانة؟؟
(ما خبرناكم عن دار السينما، ادري فيكم بتقولون عارفينها لكن الاحتياط واجب.
بإختصار هي نفس السينما شاشة كبيرة وكراسي لكن مو أي كراسي، كراسيهم مريحة وانتون تتحكمون بوضعيتها مو نفس مال السينما اللي يكسرون الظهر، بعد في أكل لكن مو تشترونه كل اللي تطلبه يجيك لعندك، شنو تبون بعد عايلة الملك تخدم روحها! ما يصير.)
اليهال قصدي العيال مندمجين وي الفلم عدل، ما خذين كل راحتهم لكن مره وحده سمعوا لهم زفه أبوتهم من وراهم.
أبو كورابيكا: مجانين انتون احد يشغل المكيفات بهالجو ناوين تمرضون (كلم واحد من الخدم) بند المكيف.
أبو كونر: طلعوا برى شوفوا الثلج، وانتون هني مشغلين لنا المكيفات.
فجأة ياهم صوت من وراهم خلاهم ينتفضون بمكانهم.
أم كورابيكا: دوي بارد المكان.
أم كونر: مشغلين المكيفات؟
أبو كونر بصوت واطي: شنو جيبهم ذلين؟!، علوج.
أبو كورابيكا: شنو اللي بسكتهم؟
أم كورابيكا: شفيكم تتساسرون؟
أبو كورابيكا: لا ما فينا شي، إحنا ما تساسرنا ولا شي صح خوك!
أبو كونر: إي صح، بس ذلين الشيوخ (يقصد أولادهم) قاعدين يطالعون لكم فلم و مشغلين المكيفات.
أم كونر: شنو! المكيفات بهالبرد (تكلم الأولاد) انتون شنو فيكم ما تفهمون خرفتون احد يشغل مكيفات بهالبرد!
الشباب حدهم منزهقين كفاية الفلم اللي يطالعونه رعب والحين دخلت أهلهم زاد من خوفهم.
كورابيكا: خالتي إحنا لا جنينا ولا خرفنا بس هاي بتش من دخلنا قالت شغلوا المكيفات حـــر.
أليسا مو مصدقه اللي يقوله: أيا الجذاب ما قدر على جذبك، الحين أني اللي قلت جذي أو انت (تقلد عليه أول ما دخلوا) بل حر موت شغلوا المكيفات خسنا راح العطر.
كورابيكا طالعها.
كونر هاج فيهم: بسكم عاد فار وسنور، حشى ما تسكتون صمختونا و انت (يكلم الخادم) وقف الفلم (كلم أهله) وانتون شنو اللي مجيبكم؟ إحنا قاعدين متونسين نطالع الفلم إلا تجون وتخربون علينا، بتتشابقون تشابقوا برى وإذا خلصتون بعدين تعالوا مو تقعدون لنا تتناجرون هني تخربون علينا، بيخلص الفلم وإحنا ما فهمنا شي افففف جهال.
من زود ما عصب قعد على الكرسي و الكل استغرب من ردة فعل كونر أول مرة يكلمهم جذي وبهاي العصبية وعلى شي تافه بعد.
أبوه عصب على كلامه لو كلمهم بهدوء ما بعصب لكن كونر هاج فيهم: كونرو ما تستحي على وجهك تطول لسانك علينا، شايفنا اصغر عيالك و إحنا ما ندري، لما أكلمك طالعني مو عاطني ظهرك.
كونر قاعد على الكرسي وموصل حده إن رد على أبوه يخاف يقول له كلمه بالغلط وتوديه بستين ألف داهية فوقف يم كورابيكا.
أبو كونر: انت شنو فيك؟ اليوم العصر شحلاتك تضحك وتسولف والحين هايج علينا.
كونر مارد.
أبو كونر: رد علي، ليش ساكت خب إحنا إلا جهال ما نفهم تعال انت علمنا، شفيك ما تتكلم القط أكل لسانك.
حس أبو كورابيكا إن السالفة بتكبر إذا ما تدخل وهدأ أخوه، توه بيتكلم لكن سبقاه كونر: آسف ما كان قصدي.
راح صوب أبوه وحب راسه وراس عمه وأمه وخالته، كلهم سامحوه ماعدا أبوه لكن قنعاه أخوه وقال له كمن كلمة بعدها سامحاه.
كورابيكا كيرا وأليسا أول مرة يشوفون أبو كونر معصب لهاي الدرجة على واحد من عياله، طول عمره ما عصب عليهم وهاي أول مره بحياته يعصب جذي لكن اشوه إنها مرت على خير، لكنهم مستغربين بعد من تصرف كونر.
بعد ما هدأ الجو بغى كونر يطلع من الصالة لكن أبوه وقفاه: وين بتروح يولدي؟
كونر: بتمشى شوي.
أبو كونر: افاا الحين إحنا جايين عشان نقعد معاكم وانت بتروح، امش خلنا نطالع الفلم وإذا خلص نتمشى مع بعض.
أبو كورابيكا: يلى امش خلنا نطالع مع بعض من زمان ما طالعنا أفلام وي بعض.
كونر ما بغى يرفض طلب أبوه و عمه، قعدوا كلهم بصفه وحده يتابعون الفلم.
بعد ساعة ونص كمل الفلم.
أم كونر: وه أخيرا خلص.
أم كورابيكا: يلى قوموا فطست من الحر.
كورابيكا: البركة بالوالد والعم اللي بندوا المكيف.
كيرا: صباح الخير يما، صباح الخير خالتي.
أم كونر: شفيش؟ الدنيا لليل مو صبح.
كيرا: إي لكن انتون توكم قاعدين من النوم، لازم نصبح فيكم.
كورابيكا يمزح: يما خالتي من متى و انتون تخافون من أفلام الرعب.
أليسا: خسارة ما درينا من قبل، جان حطينا لكم فلم يخلي الواحد يبول بمكانه.
ضحكوا كلهم ماعدا أمهاتهم.
أم كورابيكا: الحين انتون قاعدين تتمصخرون علينا، شايفينا نكته قدامكم وإحنا ما ندري.
كورابيكا: السموحه بس هاي بناتكم مادري شفيهم (يكلم أخته وأليسا) انتون ما فيكم عقل احد يطنز على أمه.
كيرا + أليسا: مشكل مشاكل، نسيت روحك مين اللي قال (يقلدون عليه) يما خالتي من متى وانتون تخافون من أفلام الرعب، مالت.
كورابيكا: بل انتون الحين كمبيوتر، كل وحده حافظة كلام الثانية لا بعد نفس الوقت.
أبو كونر: كورو لا تقعد تحسد بناتي لا أنتفك قدام أبوك.
كورابيكا: بناتك! خبري عندك بت وحده مو ثنتين.
أبو كونر: كلكم أولادي وحبايبي بعد.
كورابيكا: إي جذي ok no problem .
كيرا: أيا الغيور.
كورابيكا: أنا أغار منش no way .
كيرا: عيل شنو تسمي اللي كنت تقوله.
كورابيكا: الحين براويش منهو اللي يغار.
راح صوبها بس هي شردت عنه و راح يركض وراها كأنهم يهال.
كيرا: ما بتصيدني.
أم كونر: توني دارية إنهم يهال.
أم كورابيكا: للحين ما شفتين بلاويهم يمزحون ويلعبون وي بعض كأنهم توهم بو 8 سنين.
أم كونر: نفس اللي عندي (طالعت أولادها) شرايش تييبين لهم واحد يونسهم؟
أم كورابيكا: لا بس ما فيني شدة تربية من يده ويديد.
على هاي السالفة وصل كورابيكا مع أخته وهم يضحكون و يفلصون بعض.
كورابيكا: خالتي ارجوش لا تفرين راسها وتسويها، ترانا مانبي.
كيرا: خالتي انتين ييبي توش شباب أما أمي عيزت وخلص بيضها.
ضحكوا.
أم كورابيكا: أيا السوسة الحين أني امش تقولين لي عيزت وقدامي بعد، إلا أشوف لسانش طول شبرين اليوم.
كيرا حبت أمها: Sorry mom ما كنت اقصد، وهالويه احد يقول له عيوز إلا قمر ومن زود جماله ما قمت افرق بينه وبين القمر، حبيبتي انتين وحياتي كلها.
أم كورابيكا: بس خلاص سامحتش، لكن إن عدتينها مره ثانية يا ويلش.
كيرا: ولا يهمش ماما ما يصير خاطرش إلا طيب (كلمت أخوها) كورو سمعت إياني وإياك تقول لأمي عيوز بقص لسانك قص (تكلم أبوها) وأنت يبا إن سمعتك تقول لأمي عيوز بشوف شنو بسوي فيك (كلمت أمها) شفتين ماما خلاص محد بقول لش عيوز عقب اليوم، واللي يقول دزيه علي براويه.
أبو كورابيكا: لا ما غلطت امش لسانش طول بدال شبرين 10.
كيرا: افاا عليك يبا تباني أطوله مليون حاضرين ما في مانع.
أم كورابيكا: انتين شنو مآكله اليوم؟
كيرا: Nothing mom ، بس الشارش اليوم ما نصرف وايد.
كورابيكا: يعني الشارش فل.
كيرا: إي عفية عليك، تصدق خوي توني داريه انك ذكي.
كورابيكا: ذلفي مناك يالمجنونه.
كيرا: اللي يقول أني امبيك الحين، أروح لعمي حبيبي وحياتي وطوايف هلي كله.
باسته بخده ووقفت صوبه وهو حط يده على كتفها.
أبو كونر: امشوا بس عن الهدره الزايده، تراني جعت بطني يصاوي.
كيرا: يصاوي شي داخله عصافير أو لا يكون حامل عن مرتك، يووو مو زين عمي فشلتنا المرى اللي تحمل وأنت عندك العكس.
الكل ضحك على كلامها وعمها ضربها بالخفيف على يدها وراح معاها لغرفة الطعام والسوالف والضحك قايمه بينهم، ماعدا كونر ظل ساكت بس يضحك معاهم.
بعد الأكل والضحك وسوالف كيرا اللي الكل استغرب من كلامها لهذا اليوم راحوا للقاعة العامة يكملون السوالف، كونر استأذن منهم على انه بيتصل وبعدها بينضم لهم.
كورابيكا كيرا وأليسا انشغل بالهم على كونر لكنهم ما حسسوا احد من سوالفهم و ضحكهم.
نروح للحديقة شوي.
كونر قعد يم النافورة يلعب بالماي بيده ويفكر وكل دقيقة يتصل بس محد يرد عليه، وهذا خلى قلقه يزيد و واضح من ملامح وجهه.. بعد 10 دقايق يى له كورابيكا وشافاه قاعد بمكانه ومغطي راسه بيدينه.
قعد يمه وحط يده على كتفه: كونر شفيك؟
طالعاه وابتسم عشان لا يبين له شي: لا ما فيني شي، بس مليت من القعدة داخل قلت بتمشى شوي و اغير جو.
كورابيكا: توك مساعه تقول بتتصل والحين بتتمشى وتغير جو، كونر هذا الهرار قوله لغيري، قول لي شنو فيك؟.. إذا ما قلت لي بتقول لمنو؟
ابتسم: عندي أختي.
ما توقع كورابيكا برد عليه جذي لأنه كان جاد بكلامه: جزات الخير جاي لك لهني ومتعني عشانك، خليت أختك تقعد و أنا جيت والحين تقول لي عندك أختك، مالت بس أقوم أحسن لي وخل أختك تنفعك.
قام عنه وهو معصب وكونر ظل يترجاه عشان يقعد: اقعد يمعود، امزح معاك.
كورابيكا غاور عنه وما رد.
كونر: الحين أنا أخوك وولد عمك تغاور عني وما تكلمني، بس خلاص ازعل الطقاق يطقك وعندك جدران بيتكم خلها تفيدك..أنا بمشي أحفظ كرامتي أحسن لي منك.
كيرا وأليسا كانوا يراقبونهم بدون ما يحسون بوجودهم، بغوا يدخلون قبل لا يصير شي بينهم، لكن كونر اللي وصل لعند الشجرة ورجع لكورابيكا اللي كان واقف مكانه يطالعه ومن شافاه راد غاور.
كونر: منت متنازل يعني، المشكلة قلبي طيب وماقدر على زعلك، شنو قلت طاح الحطب.
مد له يده عشان يصافحه.
كورابيكا طالعاه بعيونه وصافحاه: طاح وانكسر.
ابتسموا وعانقوا بعض.
كونر: تصدق كنت بروح اكلم ألس لكن قلت السالفة تخص الرجاجيل وهي ما بتفيدني بشي، انت أولى منها.
أليسا عصبت من سمعت كلام أخوها: السالفة تخص الرجاجيل واني ما بنفعك بشي وهو أولى مني، ما علي كونرو يصير خير ماكون ألس بت جين بوتر إن ما خليتك تركع وتبوس ريلي عشان أسامحك، يصير خير كونرو براويك بخليك حتى اسمك تنساه وان ما صار ماكون أني أليسا.
كيرا ودها تضحك على كلامها لكنها ميوده روحها: سكتي خلينا نسمع.
كورابيكا: انزين قول لي السالفة دام ألسو ما منها فايدة أكيد السالفة جايدة.
أليسا عصبت أكثر من كورابيكا: ألسو بعد، ما علي بشوف شنو بسوي فيك كورو بخليك تلعن اليوم اللي انولدت فيه! بشوف.
كيرا: Please ألس سكتي بعدين سوي فيهم اللي تبين، بس خلينا نسمع الحين ok حبيبتي.
كونر بعد ما اخذ له نفس طلع تلفونه وظل يطالعه وكورابيكا مستغرب من تصرفه.
كونر: اليوم الظهر تقريبا الساعة 1 اتصلت ببرو وكلمتها عادي مثل كل يوم، والعصر قبل لا أجي لكم اتصلت لها بس ما ردت علي ولين الحين كلما اتصل ما ترد، أطرش لها مسجات بعد ما ترد، خايف يكون صار لها شي.
كورابيكا يهدئه: لا تخاف يمكن انشغلت شوي و ما قدرت ترد عليك.
كونر عصب: تنشغل كل هذا الوقت عاد ما صارت على الأقل طرشت لي مسج رنه عشان اعرف، وهي ما قالت لي إن اليوم بزورونهم احد عشان اعرف، ياخي ما صارت هذي من العصر للحين و أنا اتصل وهي ما تجاوب علي، تدري شلون أنا بروح لها واللي يصير يصير.
قام كونر كورابيكا لحقاه ويوداه وظل يهدئه: شفيك انت معصب استجنيت عشان تروح لها، أصلا انت ما تدلي بيتهم، شلون تبي تروح؟
كونر: ما يخصني بطلع بيتهم لو من تحت الأرض.
كورابيكا: كونر أنا ما هقيتك جذي خاف عليها لكم مو لهذا الحد، هدي أعصابك وفكر زين وأنت معصب ما بتقدر تفكر.
قعد كونر وكورابيكا تذكر مره من المرات اتصل ببايبر وما ردت عليه وهو حده خاف عليها ولا فوق 20 مرة يتصل لها ويطرش مسجات وما ترد بغى يجن جنونه ليما بعدين هي اتصلت وهاج فيها المسكينة وهي اعتذرت منه لأنها كانت تسبح وما سمعت التلفون يرن، وبعد هذا عرفوا أي قد يحبون بعض.
نرجع لكونر اللي هدأ لكن داخل بركان يثور.
كورابيكا: شوف يمكن انشغلت شوي وما قدرت ترد عليك أو ما سمعته يرن أو نسته أو شي كل شي جايز بس انت هدي بالك الحين.
كورابيكا تذكر كلام بايبر: صحي بايبر خبرتني بتطلع مع أولاد عمها اليوم أكيد برو معاهم.
كونر طالعاه و يته فكره: كورا حبيبي انت قول لي تم.
كورابيكا: على شنو؟ شفيك؟
كونر: انت بس قول لي.
كورابيكا: تم.
كونر: يلى اتصل لبايبر وأسألها عن برو.
استغرب: شنو؟
كونر: اللي سمعته مو هي بت عمها أكيد بتكون معاها، اتصل لها please عشان خاطري.
كورابيكا: ما قدر هي طالعه مع أولاد عمها شلون تباني أزعجها.
كونر: افف الحين الساعة 11 ونص أكيد ردوا من زمان.
كورابيكا حس كونر مضايق ما هان عليه يشوف ولد عمه جذي أخذ تلفونه واتصل: شوف إن صاداها احد يا ويلك مني عقب.
كونر استانس و باساه وحضناه.
كورابيكا: الحين تباني اتصل أو شنو؟
كونر: لا لا لا خلاص بقعد بس تكفى اتصل، وخله speaker عشان اسمع عدل.
كورابيكا: شنو speaker؟ أقول إلحق أمك وما ني متصل.
كونر: لا لا لا خلاص ما بتكلم ومامبي اسمع شي بس تكفى اتصل.
عمى كورابيكا يتصل هو خايف عليها من داخله يمكن احد يصيدها أو شي وبعدها بطيح السالفة على راسها وهو ماوده يأذيها وما يهون عليه يشوف ولد عمه يعاني عشان الحب، قعد يلعن ويسب بالحب ونسى روحه إنه يحب.
بايبر كانت بالسيارة مع أخوها بردون للبيت بعد ما كملوا أمسيتهم ومن شافته متصل تدودهت شلون ترد عليه وأخوها معاها.
ليو: ليش ما تردين؟
بايبر: لا ولا شي (ردت) ألو.
كورابيكا: هلا بأحلى وأرق صاحبة ألو بالدنيا، شخبارش؟ حبيبتي عساش بخير.
بايبر: بخير دام انتين بخير.
كورابيكا عرف إنها مو بروحها: آسف إذا ازعجتش.
بايبر: لا ما في أي إزعاج، بس الحين راده البيت مع اخوي.
كورابيكا: عجل ما بقاطعش.
بايبر:لا بالعكس.
كورابيكا: إذا وصلتين خبريني ok حبيبتي.
نزلت راسها: ok بكلمش عقب باي.
كورابيكا نسى سالفة كونر توه بقول لها باي ولما شاف كونر قاعد على أعصابه ذكر: بايات حبيبتي اوووه حبيبتي لحظة بس.
استغربت: خير شفيك آآ شفيش؟!
ليو طالع أخته مستغرب، باين على ويها متوترة شوي.
كورابيكا: لا ما فيني شي بس نسيت أقول لش شي متفشل منه.
بايبر قلبها شوي وبيوقف: خير شصاير؟ خرعتيني.
كورابيكا: ما عاش من خرعش حبيبتي، بس ولد عمي كونر، عرفتينه؟
بايبر: إي عرفتها، شفيها؟
كورابيكا: هو يبي يعرف بت عمش برو شفيها، ليش ما ترد عليه؟
بايبر: برو ما فيها شي توني مساعه شايفتنها والحين هي أكيد ببيتهم، خالاتها يايين لهم.
كورابيكا: جذي يعني مشكورة حبيبتي.
بايبر: ما سويت شي عشان تشكريني وإذا تبيني اخبرها ما عندي مانع.
كورابيكا: لا حياتي مامبي اتعبش معاي.
بايبر: تعبش راحة حبيبتي.
كورابيكا: يا بعد عمري هالكلمه، يلى ما بأخرش عن أخوش، سلمي عليه.
بايبر: شنو أقول له؟
كورابيكا: بسيطة حبيب القلب يسلم عليك.
استحت: باي.
كورابيكا: بايات حبيبتي تحملي بروحش.
بايبر بعد ما سكت عنه ابتسمت.
ليو: مين هاي؟
توترت: ها رفيقتي تسأل عن برو.
ليو: ليش ما تتصل لها؟
بايبر: ما دري.
بايبر طالعت الجهة الثانية وأخوها شك بالسالفة.
كورابيكا بعد ماسكاه: آآخ يقلبي.
كونر من بنداه نط عليه: ها شنو قالت ؟ فوين هي؟
كورابيكا: ما فيك صبر، تقول لك برو توها راده لبيتهم وعندهم خالاتها.
كونر: بس هي ما قالت لي بجونها احد؟
كورابيكا: غصب تقول لك، يمكن نست البت، يعني الواحد ما ينسى.
كونر: إي بس..
قاطعاه: لا بس ولاشي أنت قلت لي اتصل وكاني اتصلت وما دري أخوها شنو قال لها؟.. لهني وانتهت مهمتي والباقي عليك انتظر ليما يطلعون أهلها بعدين اتصل.
كونر: انزين بس لا تقعد تتأمر علينا خلاص فهمنا.
دزاه بالخفيف على ورى وبما إنه قاعد يم النافورة أو بالأخص النافورة وراه فقد توازنه وطاح فيها تسبح بكبره وكونر يضحك عليه.
كورابيكا: بدال هالضحك ساعدني، محد غيرك بمرضني.
مد كونر له يده لكن كورابيكا سحباه وياه وطاح هو الثاني بالماي، وظلوا يضحكون على بعض.
وخواتهم ضحكوا عليهم وردوا للصالة.
كيرا: ثنينهم بيمرضون.
أليسا: خل يمرضون يستاهلون.
كيرا: بل منش انتين على طول عاديتينهم.
أليسا: أقول امشي قدامي يلى، لو هم تكلموا من وراش جذي بشوفش شنو بتسوين.
كيرا: عادي تعودت عليهم ثنينهم.
مشت وهي تضحك ليما وصلوا لعند أهلهم، بعد 10 دقايق دخلوا عليهم كورابيكا وكونر وحصلوا لهم زفة محترمة.
أبو كورابيكا: يطشش برى مطر؟!
كورابيكا: لا ما في شي.
أم كورابيكا: لا يكون طبيتون بالبرشة تتسبحون!؟
كورابيكا: هاا إي قصدي لا لا ماطبينا.
أبو كونر: لا طابين، ناوين تمرضون أول شي المكيفات والحين تسبحتون وما يندرى الثالثة شنو!
كونر: لا يبا بس هذا كورا طيحني بالبرشة وبعدين هو تزحلق وطاح وياي.
كورابيكا: أنا اللي طيحتك أو انت اللي طيحتني!؟
أم كونر: سكتوا ثنينكم، رايحين تتسبحون ويايين لنا تضحكون يلى روحوا جففوا روحكم لا تبردون.
أم كورابيكا: ما تسمعون انتون، قالت لكم قوموا يعني قوموا يلى.
نقزوا ثنينهم ركيض لدار كورابيكا، وخواتهم ميتين من الضحك عليهم.
أم كورابيكا: و ليش حضرتكم تضحكون؟ قايلين نكته.
كيرا+ أليسا: هاا لا ما في شي.
قاموا لكن أمهاتهم وقفوهم.
أم كورابيكا: بتروحون تتسبحون بعد!
أليسا: إي خالتي من زمان ما سبحت ببرشة.
أم كونر: بتنرزون ثنتينكم هني وما في روحه، يلى قعدوا.
كيرا تهمس لأليسا: زين سويتين، الحين شنو بطلعنا من هاي الورطة ما يسوى علينا عيبنا على ذلاك.
أليسا: لا تخافين وامشي قدامي.
كيرا: إي عشان يعصبون زيادة.
أليسا: امشي بس.
أم كورابيكا: شفيكم تتساسرون؟
كيرا: لا ما فينا شي يما سلامتش.
توها كيرا بترد لمكانها لكن أليسا سمتتها من يدها وطلعوا وهم يقولون: باي.
أمهاتهم ينادون عليهم.
أبو كورابيكا: هدوا بالكم انتون، يعني صدقتون كلامهم.
أم كورابيكا: إي هالزمن كل شي يسوونه.
أبو كونر: ألس وكيرا ما يسوونها هم أعقل من ذلاك.
أم كونر: يخوفي يطلعون أهبل مو أعقل.
كيرا وأليسا راحوا لأخوانهم يشوفونهم ويطنزون عليهم.
دخلوا الدار بدون ما يستأذنون، فتحوا الباب تقريبا كامل ولما شافوا أخوانهم جمدوا مكانهم وذلاك يطالعونهم. كورابيكا وكونر كانوا بس لابسين الملابس الداخلية فجذي كيرا استحت من كونر هي متعودة على أخوها، وحتى أليسا استحت من كورابيكا، سكوا الباب بسرعة وهم يقولون: Sorry .
من زود الفشيلة دخلوا لدار كيرا وكل وحده تلوم الثانية.
كيرا: كل منش قلت لش خلنا نستأذن أول.
أليسا قعدت على السرير: أني أو انتين اللي قلتين.
كيرا: خلاص لا تاكليني.
أليسا: أحسن عشان مرة ثانية لا ترمينها علي، لكن تصدقين وقفتهم يم بعض كشخه.
كيرا: احم احم أخوي ما رضى عليه.
أليسا: مشكل اللي يقول ميته عليه عندي واحد ما مبيه خليه لش وحطيه بمخباش بعد.
كيرا: أكيد، تعالي انتين على طاري الواحد سمعي هاي الأغنية.
أليسا: بعد سويتين، شنو العنوان؟
كيرا: لا تنساني.
أليسا: عربي.
كيرا: إي عندي ثنتينEnglish وهاي أول وحده عربي، عاد مو تعيبين.
أليسا: افاا عليش متى عيبت على وحده من ابداعاتش، يلى شغلي ما فيني صبر.
عمى هم يسمعون الأغنية خلوني أقول لكم شي ما ذكرته قبل.
كيرا من طبعها تكره الأغاني، الحين أكيد تتساءلون دام إنها تكره ليش بتسمعها؟
بقول لكم، اللي ما تعرفونه كيرا تكتب قصايد وأشعار و خواطر، بعدها تألف معاهم موسيقى ودخل صوتها وياه، فيكون مثل الأغنية وأحلى بعد لان صوت كيرا وايد حلو، وبما إنها تحب الموسيقى الهادئة فمعظم الأغاني اللي تألفها تكون حزينة أو سعيدة بس تركب مع نطاق الموسيقى.
نرجع لكيرا وأليسا المندمجين وي الأغنية لدرجه إنهم ما سمعوا طرق أخوتهم للباب، دخلوا شافوا خواتهم منبطحين على السرير ويسمعون الأغنية، بعد ما كملت سمعوهم يغنونها.
قامت كيرا عشان تبندها وانصدمت لما شافت أخوها وولد عمها، كيرا من الصدمة وقفت غنائها وبقت أليسا تغني بروحها لأنها ما شافتهم صوتها كان روعه قريب كلش لصوت كيرا.
بعد ما كملت غنائها: شرايش بصوتي كيور؟
سمعت صوت تصفيق قامت تطالع كيرا: لهاي الدرجة صوتي حلو كـــ.
من شافت أخوها وولد عمها يصفقون ومبتسمين لهم انصدمت.
كورابيكا: ما درينا عندنا مغنيات هني.
كيرا حطت يدينها على خصرها: مين قال لكم تدخلون بدون استئذان!؟
كورابيكا: شوفي عاد يختي إحنا طقينا الباب ليما تكسرت يدنا، ملينا من زود ما نطق ودخلنا إلا نسمع أصوات حلوه تغني، عدل خوك.
كونر: إي عدل، مو نفس بعض الناس يدخلون بدون استئذان.
تعمد يقولها لأنه يعرف أخته وكيرا بيستحون، وبالفعل احمر ويهم ثنتينهم، وأخوانهم مستانسين.
كيرا راحت يم اللابتوب مالها عشان تبند الأغنية والملف كامل قبل لا يشوفونه.
أليسا: شنو تبون الحين؟
كونر: ما نبي شي بس غنوا لنا نبي نسمع، غنائكم واجد حلو.
كيرا: إي تطنزوا شوراكم انتون غير التطنز.
كورابيكا: لا صدق ما نطنز يلى غنوا لنا.
كيرا + أليسا: No way.
كونر: بل، انزين شغلوا لنا الأغنية نسمعها، بعد عندكم مانع!
كيرا: إي عندنا مانع.
كورابيكا: إذا انتين مغنتنها دافعي عاد، بس هاي مو انتين.
تورطت كيرا شلون تطلع من هاي الورطة، بس لا يكون عرف صوتها لأنها ما خبرت احد غير أليسا، ويمكن هي قالت لاخوها وهو قال لكورابيكا.
أليسا انتبهت لكيرا وباين عليها متوترة، هي تعرف كيرا ما خبرت احد غيرها وما تبي احد يعرف، فغيرت الموضوع: تعالوا انتون ما خبرتونا ليش متسبحين؟
كونر: سمعتين اللي قلناه مساعه بعد تبينا نعيده.
أليسا: اللي قلتونه أكيد جذب، يعني إحنا ما نعرفكم قولوا الصدق يلى.
كورابيكا: بنقول إذا شغلتون.
توها كيرا بتتكلم لكن سبقتها أليسا: Ok .
كيرا طالعتها والشرار بعيونها، لكن أليسا تسوي روحها مو مهتمة: يلى شغلي وفكينا.
كيرا تقدمت منها تساسرها: ينيتين إذا شغلتها أكيد بيعرفون الصوت.
أليسا: خير يا طير و إذا عرفوه بياكلونش يعني، شغليه الحين أكيد ما بيعرفون.
كيرا: وإذا عرفوه.
توها أليسا بتتكلم إلا وسمعوا صوت الأغنية طالعوا أخوانهم لقوهم مشغلينها ويطالعونهم، كيرا شوي وتموت وهم مستانسين ويغمزون لهم.
كيرا تصرفت بشكل عادي عشان لا يشكون لكنها خايفة يعرفون صوتها، بعد ماكملت الأغنية.
كونر: واااو شنو اسم هاي المغنية؟ أول مرة اسمع صوتها.
كورابيكا: تكلموا شنو اسمها؟
أليسا: شنو عليكم من أسمها بتغازلونها يعني.
طالعوا بعض: يمكن.
ابتسموا خواتهم، كورابيكا طالع بالشاشة.
كيرا: شنو تطالع؟
كورابيكا: إذا ما بتقولون لنا اسمها بطلعه بروحي.. عندش بعد أغنيتين شرايك كونر أي وحده نشغل، stay alive or your in my hart ؟
كونر: خلنا نشيك stay alive .
كيرا ما قدرت تمنعهم، شغلوا الأغنيتين و عجبتهم وايد و للحين مصرين يبون يعرفون اسم المغنية.
كورابيكا: كونر ما لاحظت شي بالأغنية؟
كونر: مثل شنو؟
كورابيكا: الصوت!
هني ويه كيرا تعفس اللي كانت خايفة منه صار، وأليسا بعد توترت لأنها مشتركه معاها بغنية stay alive .
كونر يفكر: مادري كأنه مألوف.
كورابيكا عاد الأغنية من يد ويديد وبعد ما خلصت كأنهم عرفوا الصوت وطالعوا خواتهم، وهم خافوا من نظراتهم.
كورابيكا + كونر: انتون!
كيرا وأليسا شوي وبيوقف قلبهم مو عارفين بشنو يردون.
لكن أليسا تكلمت: إي في مانع.
كيرا طالعتها، أما أخوانهم مستغربين.
كونر أشر على أخته: انتين ok بس انتين (كيرا) ماصدق.
كيرا: ليش حلال عليها حرام علي.
كونر: لا مو قصدي جذي بس اللي اعرفه إنش ما تحبين الأغاني واجد غير الموسيقى الهادئة.
كيرا: إي بس هذا غير.
كورابيكا: شلون يعني؟
كيرا تشجعت وقالت لهم: لأن أني اللي كتبت الأغنية وأني اللي نسقت الموسيقى.
أخوانهم توقعوهم ما خذين الكلمات من أغنية وي الموسيقى أما هم اللي مسوينها ما كانوا متوقعين هذا الشي.
كونر: ومن متى وانتين تكتبين أغاني؟ مين اللي علمش تسوين الموسيقى؟!
كيرا: تعلمت من المواقع بروحي.
كورابيكا: من متى تكتبين؟
كيرا: هاي مو أغاني أشعار بس أني أسويها نفس الأغنية وأكتب من ..
سكتت كيرا وما كملت كلامها كأنها تذكرت شي هي ناستنه من زمان، سكوتها خل الكل مستغرب ويشك، أليسا تعرف من قبل كيرا تكتب أشعار بس متى بالضبط ما تدري.
أليسا: كيرا علامش؟
كيرا: لا ما فيني شي.
كورابيكا: لا فيش مو من عادتش تسرحين بنص الكلام، إلا إذا كان في شي.
كيرا: ما فيني شي بس.. عن إذنكم.
طلعت كيرا من دارها وكلهم مستغربين من تصرفها.
كورابيكا لحقها بشوف شنو فيها.
كورابيكا: كيرا شفيش؟ علامش؟
كيرا: ما فيني شي كورا صدقني ما فيني شي.
كورابيكا: لا فيش، يلى قولي لي ليش القمر مختفي؟
ابتسمت.
كورابيكا: آآخ محد بيقتلني غير هاي الابتسامة الحلوه.
كيرا: عدال أخاف بعدين تسمعك بايبر وتغار.
كورابيكا: خلها تغار أختي أولى من كل العالم.
ابتسمت وتوها بتمشي لكنه وقفها: نطري وين بتروحين؟
كيرا: بشوف أمي.
كورابيكا حساها تبي تتهرب من الموضوع، قال بداخله (أخليها شلون أقدر أخليها لكن أخاف تزعل إذا غصبت عليها، بس ليش ما اسألها آخر مرة وأشوف، إذا ما رضت ما بغصبها).
كورابيكا: كيرا دقيقة.
كيرا: للحين واقف.
كورابيكا: شنو أسوي للحين ما تجاوبين على سؤالي.
كيرا حسته يبي يعيد نفس السالفة بس سكتت.
كورابيكا: ما قلتين لي، ليش القمر مختفي؟
طالعته وابتسمت وحست براحه داخلها.
كورابيكا: يلى جاوبيني، ما بتمشين إلا لما تجاوبيني أمي ما بطير عنش.
كيرا جاوبته بدون ما تفكر: لأن الغيوم حاجبتنه ومخلتنه يسبح بذكريات الماضي.
كورابيكا انصدم من كلامها وما فهم قصدها، هو يعرفها زين ما تقول كلمه إلا لها معنى ثاني، لكن (ذكريات ، ماضي شنو قصدش، أي ماضي تقصدين؟؟!)
أما كيرا ما عرفت ليش قالت جذي؟ يمكن من كثر ما تفكر بماضيها!: عن إذنك.
مشت كمن خطوة لكن أخوها مسكها من ذراعها.
كورابيكا: شنو قصدش بذكريات الماضي؟
كيرا ما قدرت تطالعه بعينه لأنها خايفة إذا تلاقت عيونهم يكشف كل اللي بقلبها: كورا هد يدي.
شنو قصد كيرا بذكريات الماضي؟ وليش عبر عنها أخوها بأي ماضي؟ معقولة حياة كيرا كلها عن ماضيها؟ وليش ما تبي أخوها يعرف عن بدايتها بكتابه الأشعار؟
ولا تنسون ليو اللي بدا يشك بأخته، بيعرف عن علاقتها مع كورابيكا أو لا؟
كل هذا بتعرفونه بالجزء السادس.

إحصائية العضو

اوسمتي

 
مجموع الاوسمة: 1

إحصائية العضو

اوسمتي

 
مجموع الاوسمة: 1

إحصائية العضو

اوسمتي

 
مجموع الاوسمة: 1

كورابيكا شوي ويعصب زاد ضغطه على يدها: مب هادنها قبل لا تتكلمين.
كيرا آلمتها يدها: كورا تألمني.
كورابيكا: كيرا تكلمي أحسن لش، شنو قصدش؟
كيرا: كورا مو قصدي شي، بس هد يدي.
بهاي اللحظة تلاقت عيونهم ببعض.
كيرا تحس أخوها واصل حده أول مره تشوفه بهاي العصبية معاها، أما هو كل اللي فهماه من عيونها الألم من ذراعها و ذيك النظرة اللي حيرته وكل اللي فهمها منها الحزن وما قدر يتوصل للباقي أو يفهمه لأن كيرا نزلت راسها.
شوي شوي خف كورابيكا من ضغطه على يدها وظل يطالعها وهي منزلة راسها، ما تحمل الموقف ومشى وظلت كيرا بمكانها تفكر باللي صار.
طالعت أخوها ونادته: كورا.
ما هتم لها و واصل مشيه، لكن لما نادته مرة ثانية: كورابيكا.
هني وقف مكانه لكن ما دار لها وهي يت لعنده وهو ظل يفكر (كورابيكا ليش كيرا؟ ما تعودت عليش بكورابيكا، ليش كيرا؟ ليش يختي ناديتيني جذي؟ كورا على لسانش أحلى ناعمة رقيقه، ما حبش تناديني بكورابيكا، ناديني بكورا واللي يسلمش ناديني بكورا يختي)
وقفت كيرا قدام أخوها رفعت راسه بيدينها وحضنته وهي تصيح وتقول: آسفة خوي آسفة، ليتني قلت لك من قبل ما كان صار اللي صار، آسفة آسفة.
كورابيكا ما تكلم بالبداية لكن بعد ما تكلمت كيرا وحضنته: خلاص كيرا ما صار شي بس لا تصيحين قطعتين قلبي يختي.
كيرا هدأت شوي وقعدت مع أخوها على الكرسي يم بعض ساكتين.
كيرا ودها تقول لاخوها لكنها مو عارفة شلون تبتدي و كورابيكا مو عارف شنو يقول كل اللي شاغلنه الحين ليش للحين ما نادته بكورا.
بقول لكم شي، لاحظتون انتون تفكير كورابيكا بأن كيرا للحين ما نادته بكورا، اسم كورا يعتبر مميز عنده وعند أخته، وعلى فكرة كيرا أول وحده من صغرها تناديه بكورا بدال اسمه كامل، فصار كورا رمز خاص بينهم وبعد فترة الكل قام يناديه بكورا ونادرا إذا نادوه بكورابيكا، طبعا كورابيكا حب اسم كورا أكثر من اسمه كامل دام أخته هي اللي مسمتنه إياه .
هدأت الحال بين الأخوان لكن السكوت مسيطر عليهم، كيرا تحلت بالشجاعة وتكلمت وعلى طول دخلت الموضوع بدون أي مقدمات.
كيرا: قبل 7 سنين لما كان عمري 10 كنت بنهاية كل أسبوع ازور كلير وأظل معاها لفترة، كنت أتمنى أبقى معاها للأبد لكن بكل مرة يقنعني أبوي بالردة لهني، ليما تأقلمت مع الوضع أكثر و أكثر لكني ما قطعت زيارتها.. ولما سافرنا لأستراليا شهر ونص حز بقلبي إني ما بقدر أزورها فأخذت معاي صورة لنا صورناها قبل .. وفاتها، بأستراليا لما أظل بروحي دايما أتكلم معاها كأنها قاعدة معاي و .. بعد كمن يوم أذكر إني قريت بمجلة قسم مال الأشعار قريت فيه شعر عجبني وايد ولما.. لما طالعت صور كلير ظليت أتكلم معاها كالعادة ،كان يمي ورقة مال الفندق أخذتها ودورت لي على قلم ليما لقيته، بالبداية ما عرفت شنو أكتب لكن لما طالعت المجلة وكانت محطوطة على الطاولة واني كنت منبطحة على السرير ظليت أطالعها ليما تذكرت الشعر.. كتبته لكن مو مثل ما قريته كتبت بيت والبيت الثاني من عندي و واصلت لين النهاية بعدها قريته مرة ومرتين وثلاث وتذكرت فيه كلير، كل الكلام المكتوب (دمعت عينها وأخوها يسمعها ويتذكر أخته) كله كان يرمز لكلير عن أحلامنا، أمنياتنا وكل اللي تخيلناه وكل لحظة عشناها مع بعض (سكتت شوي ومسحت دموعها) ومن ذاك اليوم بديت أكتب أشعار حزينة وكلها تخصها هي ونادرا إذا كتبت عني، لكن بعد كمن سنه حلمت بيوم إني معاها قاعدين بالحجرة ومنبطحين على السرير كأنا كبار ما كنا نتكلم بس نتواصل بالكتابة
(الحوار الخطي اللي دار بين الخوات:
كلير: كتاباتش روعه خصوصا الأشعار لكنها وايد تألمني ليش ما تغيرين أسلوبش وتخلينها سعيدة، متأكدة بتكون أحلى بوايد.
كيرا: ما قدر.
كلير: شنو اللي يمنعش؟
كيرا: من بعد فراقش ما قدر أعيش لحظة بسعادة لازم الحزن مسيطر علي.
كلير: لازم تعودين قلبش هذي سنه الحياة ناس تموت وناس تعيش، كيرا لازم تتحملين اللي يصير وتتقبلينه، عيشي حياتش بفرح لاتخلين الحزن يسيطر عليش.
كيرا: اللي تقولينه صح لكن قلبي مات يكلير مات معاش ما قدر أعيشه، خلاص أني بعدش بكبري مت ما قدر أعيش أي لحظة بدون ما ذكرش ما قدر كلير صدقيني ما قدر.
كلير: انتين مو كيرا اللي أعرفها انتين إنسانه ثانية، إنسانه ماتحملت بعدي وفراقي إنسانه تجذب على أبوي وأمي وتوهمهم إنها نستني وينهي كيرا اللي أعرفها امبي كيرا أختي اللي انحملنا ببطن واحد وولدنا بنفس اليوم، امبي أختي اللي وعدتني بتحقق كل أمنياتنا، منتين أختي انتين وحده غير انتين وحده مسيطر الحزن على حياتها.
(ردت دموع كيرا تدمع من يديد وهي تقول لاخوها باللي صار كأنه الحين يصير قدام عينها)
كيرا بعد ما قرت كلام أختها قلبها آلمها أكثر وأكثر ما تحملت وقالت لها: حرام عليش كلير لا تسوين فيني جذي، لا تموتيني من يد ويديد، كفاية إني صبرت 10 سنين على بعدش عني لا تذبحيني من يديد، كفاية الزمن المر اللي عشته بعدش كفاية بكل فرحة عشتها بدونش، كفاية إني بأول يوم للمدرسة تمنيتش معاي، خلاص كلير ما عدت أقدر أتحمل الحياة ظلمتني، ظلمتني بفراقش ارحميني يختي وأخذيني معاش.
(كيرا ما قدرت تمسك روحها وصاحت من كل قلبها حتى كورابيكا دمعت عينها وحضن أخته يهدئها ويقول بداخله: كل هذا عانيتينه وأنا مادري، ليش ما قلتين لي من قبل؟ ما توقعتش لهذي الدرجة مشتاقة لها، آآخ كلير شوفي برحيلش شنو سويتين غيرتين مجرى الماي، وإحنا مانقدر نسوي شي، محد عانى بفراقش كثر كيرا هي الوحيدة اللي بداخلها بحر آلام لفراقش.
حضنها وبعد ما هدئت واصلت كلامها، ما حب يمنعها دام إنها تبي تبعد الهم عن قلبها وتفضفضه له)
قربت كلير من أختها ومسحت دموعها: دموعش غالية عندي ما حب اشوفش تصيحين بكل دمعه من عينش تحرقين قلبي.. صدقيني كيرا اللي قاعدة أقوله لمصلحتش ادري شكثر عانيتين من بعدي، أني ماغبت عنش لحظة وحده كنت دايما معاش أو نسيتين إحنا توائم وقلبنا ببعض.. كيرا عمري ما بتخلى عنش، لا تقولين لي قلبش مات لأني ما بسمح له يموت دام هو عندي(أشرت على قلبها) وانتين بتسمحين لقلبي يموت عندش؟
طالعتها وشافت ويها منور وابتسامتها زايده على جمالها.
ابتسمت: قلبش دام عندي ما بسمح له يموت.
حضنوا بعض وهم فرحانين.
كلير: متأكدة إنش بتحفظينه مثل ما أني حفظت قلبش) سكتت كيرا شوي ومسحت دموعها و طالعت قدامها وابتسمت كأنها تشوف أختها واقفه: من ذيك اللحظة وعدتها بكتب أشعار متنوعة ما بركز على نوع واحد، والحين أكثر شي عن..love.
طالعت أخوها شافته مبتسم لها لكن تعابير ويه ما ترمز لشي محدد.
كيرا: كورا ادري انك زعلان علي ترى ما كان قصدي اخبي عنك هذا الشي غصبن عني ما قدرت أقول لك.
كورابيكا من سمع اسم كورا فرح فرح ماله حدود طالع أخته وابتسامته شاقه حلقة: شنو قلتين؟
(بغى يتأكد المسكين)
استغربت : إنك زعلان مني.
كورابيكا: لا لا اللي قبله.
كيرا: شنو اللي قبله؟ عن شنو تتكلم؟
كورابيكا: اللي قلتينه بالبداية.
ما فهمت قصده: كورا شنو تقصد؟
كورابيكا: ياااي قوليها بعد.
كيرا: كورا شفيك؟ لا يكون مصخن؟
كورابيكا قام يرقص قدام أخته وهي مو عارفه شنو فيه.
قامت عنه وهو لحقها: نطري وين رايحه؟
كيرا: أي مكان بس المهم ما صير مينونه مثلك.
كورابيكا: الحين أنا مينون!
كيرا: ما شفت روحك شلون ترقص، شنو يسمونه هذا ؟
كورابيكا: ما يهمني سميه اللي بتسمينه، بس اهمشي قلتينها.
كيرا خلاص وصلت حدها مو فاهمه كلام أخوها: كورابيكا ما تفهمني شنو اللي قلته؟
كورابيكا اعتفس ويه وظل يطالعها بنظرات غريبة.
استغربت: شنو فيك؟ ليش تطالعني جذي؟
ظل يطالعها بدون ما يتكلم.
كيرا: كورو لا تطالعني جذي.
استانس: ايوووه عاشوا.
كيرا مشت عنه وهي مستحمقه لكنها بنفس الوقت فرحانة، لحقها كورابيكا لدارها لأن كونر وأليسا ينتظرونهم هناك، دخلوا عليهم لقوا أليسا قاعدة تتصفح ملفات كيرا باللابتوب وأخوها واقف وراها.
أليسا: أخيرا ييتون.
كورابيكا بمزح: لا بعدنا.
كيرا: الصراحة ما تأخرنا دخلنا بعدكم مباشرة.
كونر وأليسا توتروا.
أليسا: شنو عقبنا إحنا من زمان هني لا طلعنا ولا دخلنا.
كورابيكا: إي مبين، شفناكم أصلا ليش بتنكرون.
كيرا: قولوا الصدق أحسن لكم.
أليسا: شنو شايفينا.
لقت لها ضربه خفيفة على راسها من كونر: بسش كل بسبتش فشلتينا.
أليسا: شنو شنو، منو اللي قال خلنا نروح نعرف السالفة هاا؟!
كونر: انتين.
أليسا وي أخوها شوي وبيتشابقون وكورابيكا وكيرا يضحكون عليهم.
كيرا: إنطموا ثنينكم، قولوا إنكم لحقتونا خلاص لازم شبقه، وبعدين أحسن ريحتوني لأني ما حب أعيد السالفة مرتين.
كورابيكا كونر وأليسا سكتوا واستغربوا شلون قالتها بكل بساطة بدون ماتبين لهم ملامح الحزن.
بعد ثواني من السكوت تقدمت كيرا من أليسا وأخذت اللابتوب: هاي أول أغنية ألفتها.
شغلتها لهم وكانت حزينة لدرجة كبيرة وصوت كيرا أحزن.
كلمات الأغنية عشان خاطركم بحطها:

( للعلم هاي القصيدة من عند صديقتي مو من عندي)
الكل تأثر بالأغنية و كلماتها خصوصا إنها موجه لكلير شخصيا، الحزن كان واضح عليهم وعيونهم دمعت، على هاي الحال كملت الأغنية وظل الصمت مسيطر عليهم وكل واحد منهم يتذكر كلير و ستيف.
قطع عليهم طق احد الخدم للباب.
الخادم: المعذرة، أهلكم يبونكم.
كورابيكا: الحين بنجي.
طلعت الخدامة وهم طلعوا وراها وراحوا يقعدون مع أهلهم يكملون السوالف.
هانتر وبليك طالعين مع ربعهم طوم و كام، دخلوا لواحد من النوادي يغيرون جو شوي وداخل معلقين إعلانات وصور.
هانتر وربعه لما قعدوا طاحت عينهم على وحده من الصور واستغربوا صورة كبيرة مكبرينها وهاي الصورة لكيرا لكن مو أي صورة لها، تذكرون الفيديو اللي نشروه لما هانتر وكيرا تصالحوا، أخذوا مقطع من الفيديو وكبروه وعدلوا الصورة وكانت لما هانتر حاط يده على خد كيرا وهي تطالعه وتبتسم لكن ويه هانتر ما يبين واضح ويه كيرا أوضح بوايد.
طوم: حتى هني حاطين صورها.
كام: للحين ما عرفتونه؟
هانتر: لو عرفته من زمان مات.
طوم: كيرا ما تكلمت.
هانتر: أنا وهي ساكتين عن السالفة لكن من يبتدي الكورس الجاي براويهم.
بليك: الزين إنها بت ملك ولها صور غير لو هذا راحت عليها.
هانتر: بس عشان هي بت الملك لازم كل العالم يشوفون صورها.
بليك: اللي اقصده لو هي بت واحد عادي ونشروا صورها بطيح بورطة لا لها بداية ولا لها نهاية.
طوم: كلامه صح، على الأقل لو عرف أبوها ما بلومها.
كام: معقولة للحين أبوها ما يعرف!؟
هانتر: هي ما تبي تخبره، لو قالت له طلع كل واحد كان يصورها وما يندرى شنو بسوي فيهم.
كام: لازم بيعرف إذا مو الحين عقب.
هانتر سكت وظل يطالع صورة كيرا والكتيبة عليها: ملكة جمال العالم، أميرة الأمراء، ملاك الإنسان...
وغيره من الكلام العسل.. خب كيرا مشهورة هناك بطيبها والاهم من هذا جمالها و الكل يتمنى شوفتها.

كيرا بهاي الوقت تتكلم بالتلفون مع وحده من ربعها وتتمشى بالممر، بعد ما كملت، ردت لأهلها وصادفت عمها قاعد بالشرفة يتكلم بالتلفون ما حبت تقاطعه وقبل لاتدخل نادى عليها عشان تنتظر، قعدت كيرا على حافة البلكونه تنتظر عمها يكمل بعدها.
جين: ناوية تطيحين يلى نزلي.
ابتسمت: عادي ما فيها شي.
جين: ما فيها شي عندش، يلى نزلي.
نزلت كيرا وهي مستانسه لخوف عمها عليها، قبل لا يدخلون لعند الجماعة.
كيرا: عمي شرايك نتمشى شوي بعدها ندخل.
جين ما بغى يرفض طلبها: على أمرش حبيبتي، كل اللي تبينه بصير، حتى لو طلبتين عيني بعطيش إياها.
ابتسمت: تسلم لي هالعين اللي بالكون بكبره ما بلقى مثلهم.
حضنها وراحوا يتمشون شوي بعدها انضموا للجماعة.
الساعة 2 وشي قام العم عشان يمشون.
كيرا: توها الناس عمي، اقعد شوي.
جين: أي توها الناس، الحين 2 ورانا بكرة شغل وقعده من الصبح، خليها لمرة ثانية حبيبتي.
كيرا: ألسو قعدي معاي.
أليسا: ألسو بعينش وعناد لش ماني قاعدة.
كيرا: ومن قال إني امبيش؟!
كورابيكا: من العصر وانتون وي بعض ما شبعتون!
أم كونر: بكرة بشوفون بعض.
أم كورابيكا: الساعة كم بتروحون؟
أم كونر: مادري بس العصر.
أم كورابيكا: عيل نتلاقى هناك.
أليسا: ماما وين بنروح بكرة؟
أم كونر: بيت أبوي خيلانش وخالاتش بيجتعون هناك.
كيرا: مو كأن يدي ويدتي مسافرين.
أم كورابيكا: ردوا اليوم الظهر، بكرة الكل بيجتمع عندهم.
كورابيكا وكونر وخواتهم من سمعوا جذي اعتفس ويهم توقعوا شي وطلع لهم شي ثاني، لكنهم ظلوا ساكتين.

كيرا: مو عدله ما نروح، الصراحة أني اشتقت ليدي ويدتي.
كورابيكا: دام ذيك النسرة هناك أنا ما بروح.
كيرا: خلها تولي وما عليك منها هي بعدهي ياهل ما تفهم بتحط عقلك بعقلها.
كورابيكا: المشكلة عندش حل لكل المشاكل.
ابتسمت.
كورابيكا: انتين لو خليتيني أرد عليها ذيك المرة جان علمتها شلون تحترم الكبار.
كيرا: إي عشان تسوي لنا مشكلة مع خالتي.
كورابيكا: خلى تصير المشاكل مردها بتعرف السبب ولا انتين راضية عن اللي تقوله لش.
كيرا: أني ما يهمني اللي تقوله أني عارفه روحي زين، خلها تقول اللي تبيه ما بنفخ راسي معاها.
سكت كورابيكا لأنه يعرف طيبة قلب أخته طالعها وهي قاعدة على سريره تلعب بشعرها ومرة وحده قامت ساسرته وحبته بخده بعدها راحت لدارها مستانسه.
كورابيكا ضحك: مجنونه.
طالع الطاولة شاف تلفونه محطوط عليها قام و أخذاه واتصل لبايبر.
بايبر بهاي الوقت توها راكبة الدرج بتروح لدارها تنام لما شافته متصل ردت عليه: مساء الخير.
كورابيكا: مساء النور يوجه النور كله، شخبارش حياتي؟
بايبر: تمام، وانت؟
كورابيكا: ناقصني شوفتش بعدها بكون بكل عافيتي.
بايبر: انت تعرف ودي أشوفك اليوم قبل بكرة.
كورابيكا: ودي ما تغيبين عن عيني لحظة وحده.
بايبر ما ردت عليه لأنها كانت منصدمه.. أخوها واقف قدامها يطالعها بنظرات غريبة وهي حدها خافت، سكت التلفون ودخلت لدارها بسرعة.
كورابيكا استغرب وخاف بنفس الوقت بغى يتصل لكنه يعرف هي ما بتسكه إلا إذا صار شي ظل يفكر يخاف يتصل لها ويصير لها شي، ماله حل غير ينتظرها تتصل.
ليو بعد فتره دخل لدار أخته لقاها قاعدة على الكرسي ومغطية راسها بيدينها ظل واقف يطالعها.
بايبر ما تعودت تخبي عن أخوها الوحيد أي شي، لكن الشي الوحيد اللي خفته عنه هو حبها لكورابيكا، رفعت راسها ولما شافت أخوها واقف يطالعها على طول نزلته.
ليو مو عاجبنه تصرف أخته من فترة لاحظها متغيرة خصوصا لما تتكلم بالتلفون إذا كانت قاعدة مع أهلها أحيانا ماترد وأحيانا تقوم تتكلم برى، وتغير كلامها لما أحد يكون معاها كل هذا يخليه يشك فيها.
ليو: لا تخليني أثور عليش وتكلمي بسرعة، منو هذا؟
بايبر خافت من لهجة صوته وما تكلمت.
ليو: بايبر تكلمي بسرعة.
بايبر: ليو السالفة مو مثل ما تظنها.
ليو: عجل تكلمي آنسة بايبر.
بايبر استغربت من كلامه أول مرة يكلمها جذي، طالعته بعدها نزلت راسها.
ليو: ليش ما تتكلمين؟ منو هذا؟ تكلمي ليش تتسترين عليه؟
بايبر بتخبر أخوها عن كورابيكا؟ وشنو بتكون ردة فعله، أخته تحب ولد الملك، معقولة بصدق؟!
ولا ننسى بت خالة كورابيكا شنو سالفتها مع كورابيكا وكونر وخواتهم؟
كل هاي الأسرار اللي عرفناها عن كيرا حزينة وسعيدة باقي أشياء وايد ما عرفناها عن شخصيتها، كل شي بتعرفونه بباقي الأجزاء.

إحصائية العضو

اوسمتي

 
مجموع الاوسمة: 1

مبدعه مآآشآآء الله

متآآبعه

إحصائية العضو

اوسمتي

 
مجموع الاوسمة: 1